Feto sira partisipa iha selebrasaun loron 16 Kampaña Ativizmu Kontra Vilénsia Hasoru Feto no Labaraik Feto iha Covalima. Imajen Tatoli/Celestina Teles.

COVALIMA, 29 novembru 2021 (ATOLI)—Adjuntu Sekretáriu Administradór Munisípiu Covalima, Francisco de Jesus Alves husu ba Centro Comunidade Covalima atu hala’o edukasaun sivika iha suku sira kona-ba violénsia kontra feto no labarik.

Loron 16 Kampaña Ativizmu Kontra Violénsia Hasoru Feto no Labarik Feto ne’e selebra ho  tema “Hateten Lae ba Violénsia Kontra Feto no Labarik Feto” .

“Ita ko’alia beibeik violénsia kontra feto no labarik maibé iha terenu violénsia kontinua akontese. Entaun, ita tenke haree estratéjia saida mak ita presiza atu halo labele ko’alia no fó formasaun de’it,” Francisco de Jesus Alves hato’o liuhosi nia diskursu bainhira partisipa iha selebrasaun Loron 16 Kampaña Ativizmu Kontra Violénsia Hasoru Feto no Labarik Feto ne’ebé lansa iha 25 novembru, iha salaun CCC, Covalima, segunda ne’e. 

Maske durante ne’e hala’o beibeik formasaun maibé violénsia kontra feto no labarik feto kontinua aas nafatin iha Timor-Leste entaun tenke muda estratéjia. 

“Ita labele nonook de’it tenke tun ba terreñu ko’alia ba inan-aman no mane sira, tenke halo eduksaun sivika atu labele halo violénsia hasoru feto no labarik feto. Durante ne’e hala’o formasaun kona-ba violénsia kontra feto no labarik, entaun tenke partisipa másimu hosi mane sira, tanba violénsia kontra feto no labarik feto mai hosi mane sira,” nia dehan.

Prezidente Konsellu Centro Comunidade Covalima, Amélia de Jesus Amaral dehan, objetivu selebra Loron 16 Kampana Ativizmu Kontra violénsia hasoru feto no labarik sira ne’e, oinsa atu haree feto no labarik feto sira. 

“Ho selebrasaun ida-ne’e, ita hakarak atu alarga tan hodi redús númeru violénsia kontra kontra feto ho labarik feto iha munisípiu Covalima,” nia dehan.  

Nia informa, ho kampaña ne’e atu promove di’ak liután feto sira-nia partisipasaun iha prosesu dezenvolvimentu no hapara violensia hasoru feto hodi bele kontribui ba dezenvolvimentu.  

Iha Kampaña ne’e, patisipa hosi adjuntu Sekretária Aadministradór, Ministériu Públiku Covalima, no partisipa másimu hosi feto potensiál sira iha Covalima. 

Jornalsita : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here