Komandante Pelutaun Brigada Xoke hosi munisípiu Bobonaro, Veteranu, Moises Afonso ‘Abu-Abu. Imajen TATOLI/Sérgio da Cruz

BOBONARO, 28 novembru 2021 (TATOLI)–Komandante Pelutaun Brigada Xoke hosi munisípiu Bobonaro, Veteranu, Moises Afonso ‘Abu-Abu, husu líder nasionál sira konvoka diálogu nasionál hodi harii unidade nasionál ba dezenvolvimentu to’o baze.

“Ita-nia dezenvolvimentu la la’o to’o baze tamba maun bot sira la unidade, tanba ne’e tenki halo diálogu nasionál, nune’e kaer metin liafuan iha ailaran dehan ‘unidade faz a força’ hodi dezenvolvimentu bele la’o to’o povu iha kraik,” Veteranu Abu-Abu, hateten iha salaun futeból kampu futeból, iha suku lahomea, postu Maliana, munisípiu Bobonaro, domingu ne’e.

Nia nota katak, tanba dezenvolvimentu seidauk la’o to’o baze mak halo komunidade iha fatin-fatin kontinua halerik ba infrastrututa bázika, hanesan bee-moos, eletrisidade no estrada.

Notísia relevante: MOP selebra aseitasaun ho empreza vensedór 26 projetu estrada rurál

Veteranu ne’e haree durante ne’e dezenvolvimentu iha setór hotu seidauk benifisia komunidade, hahú kedas iha tinan 2017 tanba impaktu eleisaun antisipada no remodelasaun Governu, ne’ebé la konsege implementa planu prioridade sira tamba nakonu ho interese partidária do que povu nia moris di’ak.

“Ezemplu iha Bobonaro, estrada iha kapitál Maliana, liu-liu ligasaun ba postu administrativu Bobonaro no Loloto’e hahú kedas hosi okupasaun Indonézia to’o agora Governu seidauk prioritiza atu rezolve,” nia akresenta.

Enkuantu, iha parte eletrisidade komunidade suku Saburai ne’ebé hela iha kapitál munisípiu Bobonaro no fronteira ho nasaun viziñu Indonézia, hahú kedas iha tempu  portugés to’o agora seidauk sente ahi nia naroman no kontinua uza solar panél no lampu tradisionál.

Notísia relevante: MOP lansa projetu eletrifikasaun ba aldeia rua  iha  Atabae

Parte bee-moos, komunidade Maliana iha área rurál sira nafatin hasoru difikuldade iha tempu bailoron naruk tanba débitu bee menus, obrigatóriumente balun tenki konsume bee hosi mota hodi responde ba nesesidade uma-laran.

“Ha’u husu favór boot ida ba na’i ulun sira ne’ebé kompeténsia ida-ne’e, presiza hateke ba kraik hodi rezolve, nune’e ema hotu kontente tamba ukun-an,” nia tenik.

Nune’e mós Veteranu, Jaime Romão ‘Dotim’, husu líder nasionál sira atu buka malu halo koordenasaun no komunikasaun di’ak, ho neon ida laran ida hodi hateke ba oin, nune’e bele halo mudansa atu liberta povu hosi kiak no mukit.

“Uluk ita iha ailaran problema saida de’it rezolve minutu balun de’it, bele feto ida no labarik ida mak fó informasaun, bele rezolve lalais de’it, uluk iha ailaran ita la’o iha tahu laran maibé bele rona malu, maibé iha ukun-an, ita-nia maun bot sira la rona malu, to’o ohin loron dezenvolvimentu mós la’o neneik tamba sira la unidade,” nia dehan.

Veteranu ne’e husu ba jerasaun foun ne’ebé envolve-an iha polítika, labele uza interese partidária atu soran no fahe líder nasionál sira.

“Liuhosi líder nasionál sira-nia unidade mak ohin loron Timor-Leste hamrik hanesan país soberanu no indepentente ida iha mundu nia le’et,” Jaime Romão subliña.

Jornalista : Sérgio da Cruz

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here