órgaun soberania no veteranu sira jantar hamutuk iha ámbitu komemorasaun loron Proklamasaun Independénsia Unilateriál 28 novembru iha Baucau, Vila Antiga, sábadu (27/11). Imajen Tatoli /Jogerjo.

BAUCAU, 27 novembru 2021 (TATOLI) – Órgaun soberania haat kompostu hosi Prezidente Repúbika, Parlamentu Nasionál, Governu no Tribunál Rekursu tenke serbí Estadu ne’e nune’e lori povu ba moris di’ak.

“Parlamentu Nasionál, Prezidente Repúblika, Primeiru Ministru no Tribunál Rekursu nu’udar orgaun ida hodi hakna’ar-aan ba Estadu ida, ketak-ketak maibé iha interdependénsia ba malu. Katak hotu-hotu serbí Estadu atu sai di’ak, ita-nia povu ida-ne’e atu sai moris di’ak nafatin,” Prezidente Repúblika, Francisco Guterres ‘Lú Olo’ ko’alia iha ámbitu jantar konfraternizasaun ho veteranu sira iha Sentru Konvensaun Baucau (CCB, sigla Portugés) Vila Antiga, Baucau, sábadu ne’e.

Xefe Estadu hakarak lori reflesaun ne’ebé antes ne’e hala’o hamutuk ho veteranu sira ho aspeitu tolu importante “ita mai hosi-ne’ebé, to’o ona iha-ne’ebé no hakarak ba iha-ne’ebé”.

Eis Prezidente Parlamentu Nasionál iha Lejizlatura dahuluk fó-sai katak, veteranu sira luta durante tinan naruk tanba hakarak lori povu ida-ne’e sai hosi kolonializmu nia okos, sai povu ukun rasik-aan no povu ho própriu soberania.

Nune’e, líder nasaun no veteranu sira tenke nafatin halibur povu hanesan iha tempu luta difisil to’o  ukun rasik-aan.

“Tinan 20 ona, ita tenke halo reflesaun ida mais sériu posível ne’ebé profunda atu hatene enfrenta tán dezafiu sira iha tempu oin,” Prezidente Repúblika alert aba Timór-oan iha ámbitu komemorasaun loron Proklamasaun Independénsia Unilateriál 28 novembru ba dala-46.

Xefe suku Bahu, postu administrativu Baucau Vila, Manuel Francisco Rodrigues Gusmão urgullu no onradu ho konvite ne’ebé ofererse hosi Prezidente Repúblika, Francisco Guterres ‘Lú Olo’.

Nu’udar autoridade lokál husu ba órgaun soberania haat atu serbisu hamutuk hodi alkansa objetivu dezenvolvimentu iha área rurál.

“Unidade tenke liuhosi asaun ruma nune’e ita sente duni katak ukun rasik-aan, bele dezenvolve duni ita-nia nasionalizmu, ita-nia unidade mak bele alkansa objetivu ba dezenvolvimentu povu,” Xefe suku Bahu aprezenta preokupasaun ne’e jantar konfraternizasaun.

Partisipa iha jantar konfraternizasaun ne’ebé oferese hosi Prezidenti Repúblika, Francisco Guterres Lú Olo mak hanesan; Primeiru Ministru Taur Matan Ruak, Prezidente Parlamentu Nasionál, Deputadu Aniceto Longuinhos Guterres Lopes, Prezidente Tribunal Rekursu Deolindo dos Santos, vetetarnu, lideransa komunitária konvidadu sira.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here