Koordenadór Jerál Grupu Artezenatu Klibur Alezadu Timor-Lorosa'e, Gariuai, Edmundo Viana Silvéiro. Imajen Tatoli/Francisco Sony.

BAUCAU, 27 novembru 2021 (TATOLI) – Maske produtu la folin iha espozisaun ne’ebé hala’o iha aldeia Darsula, suku Gariuai, maibé la hamate ezisténsia grupu artezanatu Klibur Alezadu Timor Loro Sa’e (KATILOSA) Gariuai tanba arte ne’e tempu ida sei sai interesante ba ema hotu.

Espozisaun ne’e hala’o hodi komemora loron Proklamasaun Independénsia nível nasionál ba dala-46 iha aldeia Darsula, suku Gariuai, postu administrativu Baucau Vila, munisípiu Baucau.

Koordenadór Jerál Grupu Artezanatu Klibur  Alezadu Timor Loro Sa’e (KATILOSA) Gariuai, Edmundo Viana Silveiro, sente triste tanba produtu ema la hola iha esposizaun durante komemorasaun loron Proklamasaun Independénsia Unilaterál  28 novembru ba dala-46 ne’e. 

Foto artezenatu. Imajen Tatoli/Francisco Sony

“Ami-nia produtu ema la hola durante ami tuir espozisaun durante loron lima nia laran, maibé ida-ne’e la hamate ami-nia vontade hodi kontinua prodús ami-nia kreatividade nu’udar arte, tanba arte ne’e bele halo ita badinas, depende ba ita-nia kakutak hodi halo buat-ne’ebé la vale, maibé tempu ida sei sai interesante ba ema hotu,” Koordenadór Jerál Grupu Artezanatu KATILOSA, Edmundo Viana Silveiro, informa ba Agência TATOLI, iha aldeia Darisula, domingu ne’e.

Atividade ne’ebé grupu artezanatu KATILOSA prodús mak hanesan kuda-ulun, estátua Kristu Rei no produtu artezenatu sira seluk.

“Buat sira ami ukir de’it, entaun loron ida bele halo ida rua to’o tolu, ita labele prodús barak-liu, ita presiza hamosu arte iha produtu artezenatu ne’ebé ita prodús nune’e bele atrai ema-nia matan bainhira hola,” nia esplika.

Iha fatin hanesan, membru Grupu KATILOSA, Júlio Berek Pires, hateten, durante atividade la’o ho di’ak maibé kompradór mak menus liu.

“Iha grupu ne’e mesak maluk defisiénsia, sira rasik maka prodús produtu atezenatu sira-ne’e.  Agora ami-nian planu hakarak envolve kolega sira-ne’ebé mak akaba ona sekundária, laiha serbisu, halimar de’it, hodi fó sira formasaun no fó kapasitasaun, oinsá prodús produtu artezanatu kualidade hodi buka osan ba sira nia-aan rasik,” nia katak.

Nia dehan, produtu sira-ne’ebé defisiénsia sira prodús balun fa’an ona iha Dili, Austrália no Dubai.

 “Kona-ba rendimentu ami la fixa, tanba ami prodús bazea ba ema-nia rekomendasaun mai ami. Ami-nia produtu ne’e fa’an ona iha Baucau laran no Dili ami esporta ona ba iha Austrália no Dubai,” Formadór  Grupu KATILOSA ne’e informa.

Ezisténsia  grupu KATILOSA ne’e estabelese iha tinan 2002 ho membru na’in-haat no fundu mai hosi komunidade no daudaun  ne’e membru iha na’in-hitu.  

Jornalista         : Natalino Costa

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here