Pesoál saúde prepara hela Vasina AstraZeneca iha sentru vasinasaun, kuarta (18/11). Imajen TATOLI/António Gonçalves

VIQUEQUE, 28 novembru 2021 (TATOLI)–Governu liuhosi Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, felisita Viqueque-oan tanba bele atinje programa nasionál ba vasina kontra COVID-19 ho persentajen a’as.

“Ha’u lori Governu nia naran, hakarak hato’o parabéns ba povu Viqueque, Administradór munisípiu no postu, Xefe suku no aldeia, tanba sira bele atinje programa vasina ho persentajen 93%,” Ministru Francisco hateten ba Agência TATOLI, iha salaun Administrasaun munisipál, domingu ne’e.

Notísia relevante: Inisiativa lori vasina tama-sai uma hasa’e taxa partisipasaun komunidade Viqueque

Governante ne’e konsidera, taxa partisipasaun kampaña imunizasaun ne’e bele sa’e maka’as tanba esforsu hosi autoridade no pesoál saúde ne’ebé bele konvense komunidade lokál, ne’ebé ikus mai Viqueque sai munisípiu daruak ho taxa partisipasaun vasina boot liu, enkuantu dahuluk hosi Covalima.

“Ba rezultadu ne’e, Governu haree katak Viqueque iha avansu  boot tebes tanba komunidade lokál kontrivui ba prevensaun COVID-19 iha Timor-Leste,” Ministru akresenta.

Iha fatin hanesan, Diretór Servisu Saúde munsípiu Viqueque, Francisco de Carvalho, informa, vasina iha munisípiu Viqueque ba doze dahuluk atinje 70,6% no doze daruak 93%.

“Maski rezultadu vasina atinje boot ona, maibé ami kontinua buka tuir ema seidauk simu vasina iha munisípiu ne’e,” nia dehan.

Jornalista : Vitorino Lopes da Costa

Editora    : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here