Liga feto. Imajen/FFTL

DILI, 28 novembru 2021(TATOLI)–Ekipa femenina Bubere FC susesu rekolla pontu tolu iha Liga Feto Timór bainhira manán adversáriu AD SLB Laulara ho skor 1-0.

Jogu entre ekipa rua hala’o iha kampu Federasaun Futeból Timor-Leste (FFTL), domingu lorokraik ne’e.

Bainhira parte dahuluk hahú, ekipa rua lansa kontra no atake ba malu, tuir tékniku no abilidade hosi ekipa idaidak, nune’e bele buka sé loos mak hatama golu.

Maibé, esforsu hosi ekipa rua durante parte dahuluk, to’o minutu 45 labele halo golu ruma tanba jogu entre ekipa rua la dook malu, tanba ne’e hetan rezultadu 0-0.

Hakur ba parte daruak, ekipa rua nafatin mantein idaidak ninia pozisaun tuir tátiku no abilidade.

Nune’e, Buibere hatudu jogu ho sériu, nune’e iha minutu 53, jogadora Lucelia Fernandes, lansa golu ida hodi termina Buibere nia vitória iha jornada daualuk.

Enkuantu, SLB nafatin hatudu jogu maibé la konsege halo empata jogu, tanba jogadora Buibere mesak forsa, nune’e la fó fatin ba SLB hatama golu to’o minutu termina, vitória hela ba Buibere.

Hosi vitória ne’ebé klube ne’e hetan, lori ekipa ne’e okupa iha pozisaun dahuluk iha tabele klasifikasaun provizóriu ho pontu 14, pozisaun daruak okupa hosi S’Amuser ho pontu 14, ne’ebé hanesan maibé diferente golu, enkuantu pozisaun datoluk okupa hosi Maranatha FC ho pontu ualu, pozisaun dahaat SLB ho pontu hitu no Academica okupa iha pozisaun ikus ho pontu zero.

Jornalista : Hortencio Sanchez

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here