Autoridade RAEOA, Arsénio Paixão Bano, hala’o fiskalizasaun ba konstrusaun perfurasaun sistema bee-moos iha aldeia Sonamnasi. Imajen TATOLI/Abilio Elo Nini.

OÉ-CUSSE, 28 novembru 2021 (TATOLI)—Prezidente Autoridade Rejiaun Administrativa Espesiál Oé-cusse Ambeno (RAEOA), Arsénio Paixão Bano, otimista bele dezenvolve infraestrutura bázika iha Oé-cusse to’o fatin izoladu hodi fasilita movimentu komunidade.

“Oé-cusse iha sub-rejiaun haat, suku 18 no aldeia 63, ho populasaun 870.000-resin, hamutuk ita tenki ba oin nafatin no infraestrutura bázika, tanba agora iha loke ona konkursu ba estrada rurál, bee-moos, fasilidade edukasaun no sáude públika ita aumenta bebeik, rekrutamentu profisionál, liña eletrisidade tenki kontinua la’o to’o fatin izoladu sira, ne’ebé ita hahú daudaun iha tinan ne’e no ba futuru sei mantein ritmu ne’e,” Prezidente Autoridade RAEOA, Arsénio Paixão Bano, hato’o mensajen iha komemorasaun Loron Proklamasaun Independénsia, iha kampu futeból Oé-bau, Oé-cusse, domingu ne’e.

Notísia relevante: MAE-RAEOA selebra MoU reforsa implementasaun PNDS Oé-Cusse

Nia konsidera, Oé-cusse hanesan rai enklave tanba ne’e presiza serbisu maka’as atu dezenvolve rai ne’e.

“Oé-Cusse tenki la’o ba oin nafatin no hatudu maski dook hosi sentrál, maibé bele serbisu rasik dezenvolve setór sosiál, ekonomia, no infraestrutura. Tanba ne’e, ha’u husu labele lakon esperansa maibé tenke hamutuk forte nafatin lori Oé-cusse ba oin,” nia enkoraja.

Iha biban hanesan, Konsellu Veteranu RAEOA, Jeferinu da Cruz salu, hateten, espíritu Proklamasaun Independésia 28 novembru 1975, deskreve povu moris ho terus no susár durante tinan 24, maibé iha esperansa katak iha loron ida sei hetan valór hanesan povu no nasaun ida.

Nune’e, esperansa ne’e sai duni realidade iha loron 30 agostu 1999 realiza Konsulta Populár ba destinu povu Timor-Leste nia ukun rasik-an, ikus mai hetan vitória boot iha loron 20 maiu 2001, ne’ebé konsege restaura Independénsia sai nasaun soberanu ida mundu.

“Hafoin Independénsia, durante períodu tinan 21 ona ita hetan vantajen iha setór oin-oin, maski seidauk la’o ho di’ak maibé Timor-Leste tama ona iha era dezenvolvimentu ho esperansa tenki la’o ba oin, maski la’o neneik maibé ba oin nafatin,” nia subliña.

Nune’e mós, Intelektuál Oé-cusse-oan no eis Vise Ministru Estatál, José Tanesib Anunu, motiva Oé-cusse sai na’in ba rai rasik.

“Infraestrutura bázika iha situasaun COVID-19, ha’u haree autoridade kontinua firme ba dezenvolvimentu, perfurasaun bee-moos la’o iha fatin-fatin, ha’u fiar intensaun autoridade rezolve kestaun hirak ne’e atu labele akontese krize bee-moos, maski iha fatin balun mosu problema, maibé ita espera neneik bele rezolve hotu,” nia dehan.

Ba liña eletrisidade, tinan ne’e autoridade hahú instala ona iha sub-rejiaun haat iha fatin izoladu sira.

“Ita agradese tanba uluk ita terus atu hetan ukun-an, entaun agora tenki moris dignu ona, estrada rurál anunsia ona rezultadu konkursu, ita espera bele hahú serbisu ona tanba komunidade iha área remota kuandu tempu udan tau, susar asesu mai vila tanba mota sa’e,” nia tenik.

Aleinde ne’e, José Tanesib, observa projetu barak la’o maka’as iha tinan ne’e.

“Iha eskola, saúde, bee-moos, eletrisidade, gabiaun, apoiu insentivu ba feto potensiá rurál sira, no agora ba estrada rurál, serbisu agrikultura, maski setór balun la’o neineik, maibé ita haree kuaze kobre hotu. Ha’u agradese tanba autoridade bele rezolve daudaun nesesidade komunidade, ida-ne’e mak ita hotu hakarak tanba povu tenke moris di’ak,” nia katak.

Jornalista : Abílio Elo Nini

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here