Pesoál saúde prepara hela Vasina AstraZeneca hodi iha sentru vasinasaun, kuarta (20/10). Imajen TATOLI/António Gonçalves

OÉ-CUSSE, 28 novembru 2021 (TATOLI)–Prezidente Autoridade Rejiaun Administrativa Espesiál Oé-cusse Ambeno (RAEOA), Arsénio Paixão Bano, konvida povu Atoni-oan atu partisipa másima iha kampaña vasina.

“Ita halo esforsu tomak fó apoiu programa Governu, nune’e laiha problema ho COVID-19, tanba ne’e ita tenke partisipa simu vasina hodi hetan persentajen númeru a’as iha Timor-Leste. Daudaun ita sai vensedór dahaat partisipa programa imunizasaun nasionál ne’e hosi Covalima, Viqueque, Dili no Oé-cusse,” Prezidente Autoridade RAEOA, hateten iha seremónia komemorasaun loron Proklamasaun Independénsia ba dala-46, iha kampu futeból Oé-bau, Oé-cusse, domingu ne’e.

Daudaun ne’e, taxa partisipasaun vasina doze dahuluk iha RAEOA atinje ona 80%, enkuantu doze daruak atinje 60%.

“Ha’u husu kontinua aumenta no enkoraja ba malu atu partisipa. Ha’u fó parabéns ba povo Oé-cusse tanba durante tinan-ida nia laran ita moris iha situasaun COVID-19, ne’ebé kuaze mundu tomak hetan impaktu hosi situasaun ne’e. Oé-cusse rai enklave maibé konsege aguenta, enkuantu iha fronteira haleu ita,” nia akresenta.

Prezidente Autoridade rejiaun ne’e fó sai katak, planu Governu sei halo vasinasaun Pfizer ba idade 12 to’o 17, ne’ebé iha munisípiu balun hahú daudaun ona, tanba ne’e nia husu inan-aman no dirijente eskola atu motiva oan sira atu partisipa vasina no labele konsumu lia falsu (hoax).

Notísia relevante: Estudante idade 12-17 rihun 11 iha RAEOA preparadu simu vasina Pfizer

“Ha’u husu alin sira labele tauk no fiar ba profisionál saúde tanba bainhira vasina Pfizer mai sei halo vasina iha kada eskola. Vasina ne’e atu aumenta imunidade hodi forsa liután tanba imi mak jerasaun futuru ba rai ne’e, tanba ne’e Estadu hahú hadi’a joven nia saúde,” nia apela.

Jornalista : Abílio Elo Nini

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here