Mediku sira prepara hela Vasina AstraZeneca Covid -19 hodi oferese ba komunidade sira, kuarta 18/11/2021 Imajen Tatoli/Antonio Goncalves

DILI, 28 novembru 2021 (TATOLI)—Surjimentu Covid-19 iha mundu no afeta nasaun hotu inklui Timor-Leste, atividade antendimentu saúde ba komunidade kontinua la’o tuir protokolu Ministériu Saúde (MS) no Organizasaun Mundiál Saúde (OMS).

Tanba ne’e, komunidade rekoñese katak antendimentu servisu saúde husi profisionál saúde sira la’o di’ak.

“Atendimentu  saúde iha suku la’o di’ak hahú husi situasaun Covid-19 mai to’o agora tanba Ministériu saúde ho nia programa rasik tama sai uma hodi halo atendimentu sira seluk  inklui mós vasina Covid-19,” Komunidade suku Loilubo, Postu administrativu Vemasse, Tito Xavier Freitas ba TATOLI bainhira partisipa aniversáriu prokalamasaun independénsia 28 novembru ba dala-46 iha aldeia Darsula, suku Gariuai, Munisípiu Baucau, ohin.

Suku Loilobu,  postu saúde ne’ebé iha atendimentu  di’ak ba komunidade no mós  postu saúde rasik hetan mós karreta ambulánsia ida hodi tula pasiente sira bainhira moras. “Ami hetan tan karreta ambulánsia  ida entaun ami la iha difikuldade tanba iha situasaun kalan mós médiku sira atende ami ho di’ak,” Nia esplika.

Iha sorin seluk, Xefe  suku Nunira, Nilton de Sousa Gama informa, durante ne’e  iha Suku Nunira, iha postu saúde hodi halo atendimentu ba komunidade maibé la iha bee moos hodi atende ba inan isin-rua sira atu partus.

Xefi Suku Nunira, Nilton de Souja Gama. Imajen Tatoli/Francisco Sony

“Ami iha postu saúde ba aldeia lima. Maibé, durante tinan rua ona komunidade iha suku Nunira Postu administrativu Laga problema  ba bee moos tanba inan sira  ne’ebé mak atu partus presiza bee entaun hanesan autoridade lokál iha suku refere esforsu hodi rezolve lalais probelma sira ne’e iha tempu-badak,’’ Xefe suku Nunira Nilton de Sousa Gama relata.

Notísia relevante:Bahamori ho Buibau rekoñese servisu pesoál saúde sira

Jornalista : Felicidade Ximenes

Editór: Rafy Belo

PUBLISIDADEiklan

HAKEREK NO HATÁN

Please enter your comment!
Please enter your name here