Sentru Juventude Viqueque distribui fundu ba postu tolu ba realizasaun desportu komunitaria. Imajen Tatoli/ Vitorino Lopes da Costa.

VIQUEQUE, 27 novembru 2021 (TATOLI)—Sentru Juventude Viqueque (SJV), sábadu ne’e transfere fundu $29,204.00 hosi Sekretária Estadu Juventude no Desportu (SEJD) ba postu administrativu tolu (3) hodi komemora loron proklamasaun independénsia 28 Novembru ba dala-46 (28 novembru 1975-28 novembru 2021) atu realiza desportu komunitária.

“Ohin, ami hahú distribui fundu ba postu adiministrativu tolu, atu realiza desportu komunitária,” Diretór SJV, Luis Sarmento, hateten ba Agência Tatoli, hafoin distribui fundu ba postu tolu, iha edifisiu SJV, Boromatan, Viqueque.

Postu administrativu tolu ne’ebé sai benefisiáriu mak postu administraivu Uatulari, Viqueque Vila no postu administrativu Ossu, maibé tuir planu iha segunda (29/11) ne’e SJV sei distribui fundu ba postu Lacluta no Uatucarbau.

“Ba realizasaun desportu komunitariu ami hetan konfiansa hosi sekretariu estadu juventude no desportu (SEJD), atu sai responsablidade ba orsamentu desportu komunitaria. Maibé ita hotu hatene prosesu transferénsia ninia prosesu mak nune’e,” nia dehan.

Maske orasamentu tarde, nia dehan, iha postu rua hanesan Uatucarbau no Uatulari atividade jogu la’o tiha ona no ohin jogu finál ona no postu Uatucarbau sei realiza jogu final iha loron 07 fulan-dezembru inan 2021.

“Postu tolu hanesan Viqueque Villa, Ossu no Lacluta sei halo abertura atividade desportu iha 28 novembru lokraik, bazea ba informasaun ne’ebé prezidente relata ba ami,” nia haktuir.

Atividade desportu komunitaria ne’ebé sei realiza iha kada post administrative mak kompostu hosi futebol, volibol feto no mane, ateletizmu no desportu tradisionál.

Tuir tabela oramentu ne’ebé SEJD aloka ba realizasaun desportu komunitária iha munisípiu Viqueque ne’e, postu Lacluta hamutuk $4,756.00, Ossu $6,790.00, Uatucarbau $5,434.00, Uatulari $5,434.00 no postu Viqueque Vila $6,790.00 totál oramentu hamutuk $29,204.00.

Entretantu partisipa iha serimónia entrega fundu ba postu sira ne’e, asiste hosi reprezentante SEJD iha Viqueque no postu Viqueque Vila ne’ebé simu hosi adiministradór Antonio Gregório, postu Uatulari Vise Prezidente komisaun organizadóra no postu Ossu finansa postu nain.

Jornalista : Vitorino Lopes da Costa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here