Prezidente Repúblika, Francisco Guterres ‘Lú Olo’ realiza diálogu ho veteranu sira iha Sentru Konvensaun Baucau (CCB, sigla Portugés) vila antiga, sesta (26/11). Imajen Tatoli /Zuzu.

BAUCAU, 26 novembru 2021 (TATOLI) – Prezidente Repúblika, Francisco Guterres ‘Lú Olo’ husu antigu kombatente sira atu relembra ba kotuk no projeta ba futuru nune’e lori Timor-Leste ba prosperiedade.

Xefe estadu enkoraja veteranu sira atu kontinua respeitu malu no tane aas interese estadu demokrátika Timor-Leste ne’ebé hetan independénsia hosi saudozu eroi ne’ebé mate ona.

Prezidente Repúblika sente onradu no haksolok boot hodi hasoru malu maun-alin no feton sira hotu ne’ebé hola parte iha luta libertasaun ida-ne’e, ne’ebé ohin loron ho títulu veteranu. 

Prezidente Repúblika, Francisco Guterres ‘Lú Olo’ realiza diálogu ho veteranu sira iha Sentru Konvensaun Baucau (CCB, sigla Portugés) vila antiga, sesta (26/11). Imajen Tatoli /Zuzu.

Lú Olo dehan ba veteranu ne’ebé prezensa atu liuhosi diálogu ne’e, hakat dala-ida tán hamutuk atu komemora loron 28 novembru nian ne’ebé konsagra ona konstitusaun nu’udar loron independénsia Timor-Leste nian.

“Bainhira ita hakarak halo komemorasaun ba loron boot ida-ne’e lori maun, alin, bin sira hotu, hanoin fali ba kotuk iha tinan barak nia laran, ne’ebé soe família, maun-alin, inan feton sira ba kotuk, hodi hakat tuir dalan ne’ebé ita-nia lideransa sira fó ba ita hotu ho liafuan ida, mate ka moris ukun rasik-aan,” Lu Olo enkoraja veteranu sira bainhira oferese jantár konfraternizasaun no realiza diálogu ho veteranu antigu kombatente sira, iha Sentru Konvensaun Baucau (CCB, sigla Portugés), sesta ne’e.

Komemorasaun 28 novembru hanesan aktu públiku estadu nian, signifika sai hanesan referénsia ba veteranu atu hatene tuir identidade rasik katak mai hosi ne’ebé, to’o ona iha-ne’ebé no ba ne’ebé.

“Povu no nasaun ida kuandu laiha istória rasik, ha’u bele hatete nasaun ne’e tama ona ba krize nia identidade rasik tanba la hatene nia-aan ona, haluha saida mak nia halo,” Lú Olo akresenta.

“Buat ne’ebé ami halo ka ita halo, dala-ida de’it iha ita-nia moris, la halo dala-rua no ema ida sei la repete fali saida mak nia halo iha pasadu,” Lú Olo hateten.

Xefe estadu fó-sai katak, iha nasaun demokrátika ema hotu-hotu nia interese tama hotu iha laran, sidadaun hotuhotu tenke iha interese, maibé labele bandu veteranu sira atu konta nia istória.

Nune’e mós liberdade expresaun no organizasaun konstitusaun mak fó, maibé bainhira veteranu sira sei moris sei sai nafatin referénsia ba Timór-oan hotu.

“Tenke uza demokrasia ne’e halo didi’ak, atu koalia, diskute kona-ba povu no nasaun, maibé uza atu bandu ema seluk labele konta nia istória, tolok líder sira no veteranu sira, ida-ne’e mak labele akontese,” Lú Olo fó hanoin.

Iha fatin hanesan, Veteranu atuál Deputadu Bankada Partidu Demokratika (PD), Ernesto Dudu hateten, liuhosi diálogu ho Prezidente Repúblika ko’alia mós kona-ba problema veteranu nian maibé problema hirak-ne’e labele rezolve hotu iha tempu badak.

“Prezidente Repúblika mak nu’udar xefe veteranu nian, liuhosi diálogu mak hetan dalan ruma, la rezolve karik, kiik bele maibé boot lae,” Dudu akresenta.

Entretantu, diálogu no jantár konfraternizasaun refere oferese hosi Prezidente Repúblika, Francisco Guterres ‘Lú Olo’ nu’udar parte ida atu halibur hamutuk antigu kombatente libertasaun nasionál ne’ebé mai hosi munisípiu 12 no Rejiaun Administrativa Espesiál Oé-Cuse Ambeno (RAEOA) hamutuk 52.

Durante diálogu, veteranu sira aprezenta kondisaun moris famíli nian, saúde, edukasaun, subsídiu, pensaun vitalísia inklui probelma sosiál iha Timor-Leste.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here