Ekipa jogadór Amor Oébau halakon ekipa FC Sarankeu iha 4 finál. Imajen Tatoli/Abílio Elo Nini.

OÉ-CUSSE, 25 novembru 2021 (TATOLI) – Ekipa FC Amor Oébau halakon ekipa FC Sarankeu iha 4 finál liuhosi suta penalidade iha Kopa Asosiasaun Futeból Oé-Cusse (AFO) sub-22 ho rezultadu 4-1, nune’e ekipa FC Amor Oébau hakat ba finál.

Jogu 4 finál ne’e realiza iha kampu futeból Oébau, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA) iha kinta ne’e, nune’e ekipa jogadór FC Amor Oébau hakat ba finál hafoin halakon FC FC Sarankeu iha 4 finál.

Purtantu, ekipa FC Binipu ho FC Becune sei hadau malu tikete finál nian iha loron 26 novembru. Entre klubru rua ne’e, ida-ne’ebé sai vensesór iha 4 finál, sei hasoru FC Amor Oébau iha finál Kopa AFO 2021.

Jogu primeira parte ho durasaun menutu 45, ekipa rua ne’e lansa kedas kontra no atake tuir téknika no abilidade ekipa idak-idak nian ne’ebé orienta hosi treinadór sira, maibé ekipa FC Amor Oébau sorti liu iha primeira parte tanba jogu foin la’o to’o menutu 11 jogadór Alarico Mota númeru kamizola 11 lansa golu, hodi hatuur rezultadu 1-0.

Nune’e segunda parte ho durasaun menutu 45, ekipa FC Sarankeu hahú muda estratéjia hodi troka jogadór, ho estratéjia ne’e iha duni rezultadu tanba jogu to’o menutu 68, jogadór Mayolus Oqui lansa golu liuhosi suta penalidade.

Nune’e jogu segunda parte termina ho menutu 90 ho rezultadu 1-1. Nune’e árbitru sira deside aumenta-tán extra time durante menutu 30, hodi buka vensedór hakat ba finál, maibé durante extra time durante 30 ne’e mantein 1-1.

Penalidade

Iha suta penalidade dahuluk, hahú hosi ekipa FC Amor Oébau, liuhosi jogadór médiu Eujebio Pereira númeru kamizola 10 konsege lansa golu, ho rezultadu ne’e lori sorti di’ak ba ekipa FC Amor Oébau, tanba jogadór Mayolus Oqui númeru 12 hosi FC Sarakeu la konsege lansa golu, nune’e rezultadu iha penalidade dahuluk 1-0.

Tuir mai, jogadór Alarico Mota númeru kamizola 11 hosi FC Amor Oébau lansa golu, no tuir kedas jogadór Joseferino Anin númeru kamizola 7 hosi FC Sarankeu konsege produs golu iha penalidade daruak, nune’e rezultadu lidera provizóriu hosi FC Amor Oébau 2-1.

Hakat fali ba penalidade datoluk, ekipa Amor Oébau iha ona sorti di’ak hasa’e liután vontade no esperansa katak, sei sai vitória iha jogu 4 finál ne’e, tanba jogadór Ronaldinho Cardoso númeru kamizola 12 lansa golu, maibé jogadór Januário Oqui númeru kamizola 10 hosi FC Sarankeu nafatin la prodús golu, nune’e rezultadu aumenta ba FC Amor Oébau 3-1.

Kontinua fali ba iha penalidade dahaat, Amor Oébau kontinua lansa nafatin golu, liuhosi jogadór Mouzino de Jesus númeru kamizola 14, no tuir kedas FC Sarankeu la konsege produs golu, liuhosi jogadór Romário Siqui númeru kamizola 14, nune’e rezultadu iha penalidade dahaat termina ho rezultadu 4-1.

Ho rezultadu ne’e, treinadór FC Sarankeu, Sebastião Oqui, agradese ba ekipa rua tanba konsege hatudu forsa hanesan, hodi kontinua jogu to’o faze penalidade mak foin termina.

“Hanesan treinadór, ha’u agradese tanba ekipa rua hatudu jogu di’ak no kualidade no rezultadu maka to’o penalidade maka ami lakon iha mentalidade. Ida-ne’e mak ami-nia frakeza hodi ami lakon,” nia katak.

Nune’e mós treinadór FC Amor Oébau, Octaviano Cofitalan, agradese tanba, jogu naruk to’o menutu 120 inklui extra time, maibé iha penalidade tanba mentalidade FC Amor Oébau hatudu nafatin sira-nia vontade, nune’e hetan vitória iha jogu 4 finál ne’e hodi hakat ba faze finál.

“Ami manán tanba mentalidade jogadór sira la nakdoko, ida-ne’e maka ami-nia xave atu manán, kona-ba jogu ha’u hanoin sira hatudu forsa hanesan, maibé ami sei presiza hadi’a uitoan ami-nia jogu, nune’e iha finál ami bele hetan rezultadu di’ak,” nia orgullu.

Entretantu, jogu ho durasaun tempu menutu 90 no extra time menutu 30 to’o faze penalidade, lidera hosi árbitru Rogrigo Teixeira, asistente árbitru Maria Coel, asistente line dahuluk Benedito da Conceição no Joaquim Mota.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here