Uma Kbiit laek (UKL) iha suku Fatulia, postu administrativu Venilale, munisípiu Baucau. Imajen Tatoli/Natalino Belo.

BAUCAU, 26 novembru 2021 (TATOLI) – Prezidente Parlamentu Nasionál (PPN), Aniceto Guterres, sesta ne’e inaugura Uma Kbiit Laek (UKL) tolu iha aldeia Bahadato, suku Fatulia, postu administrativu Venilale, munisípiu Baucau.

Aniceto Guterres fó parabéns ba VIII Governu Konstitusionak ne’ebé inplementa ona programa UKL liuhosi PNDS ba povu kbiit laek iha suku Fatulia, Venilale ne’ebé benefísariu mesak feto faluk hotu.

Nune’e mós Prezidente Parlamentu Nasionál parabeniza pesoál tékniku hosi PNDS, konsellu suku, lider komunitária inklui pesoál seguransa iha baze ne’ebé kolabora hamutuk finaliza UKL iha Fatulia.

“Ha’u mai haree rasik no tama to’o laran, ha’u-nia observasaun di’ak tebes, sé seidauk di’akliu karik, ita hahú ho buat foun ida, tuir ha’u-nia esperiénsia polítiku parese ida-ne’e dahuluk estadu halo uma ba povu nia kualidade di’ak,” Aniceto hateten iha sede suku Fatulia.

Aniceto rekomenda ba benefisiáriu, líder komunitária inklui komunidade hotu iha Fatulia atu kuidadu uma refere nune’e bele utiliza to’o tinan naruk.

Rekomenda mós ba Ministériu Admistrasaun Estatál (MAE) atu rejista fasilidade hanesan kanalizasaun bee-moos nune’e benefisiáriu sira utiliza ba nesesidade bázika inklui saneamentu.

“Uma ne’e di’ak ona, maibé atu dehan di’ak loloos bainhira bee-moos iha ona, tanba nu’udar nesesidade bázika, ita ema idak-idak iha nesesidade uma ida dignu atu hela maibé iha mós nesesidade seluk hanesan saneamentu, fatór ida mak bee-moos,” Xefe Lejizladór ne’e Aniceto akresenta. 

Prezidente Parlamentu Nasionál, Aniceto Guterres asina plaka bainhira inagura Uma Kbiit laek (UKL) iha suku Fatulia, postu administrativu Vemasse, munisípiu Baucau. sesta (26/11). Imajen Tatoli /Natalino Belo.

Parlamentu Nasionál rejista ona rekomendasaun xefi suku sira atu aumenta númeru uma ba família kbiit laek sira kada tinan, nune’e iha ona intendementu entre Parlamentu no Governu tinan ida ba suku ida uma neen.

Benefísiariu UKL, Rosantina do Rego de Castro agradese ba VIII Governu Konstitusionál ne’ebé oferese ona uma atu hela no nia parte husu atu programa refere kontinua iha kada tinan nune’e feto maluk ne’ebé faluk seluk bele asesu mos ba subsídiu UKL.

“Obrigadu ba Governu, liuliu Primeiru Ministru tanba ajuda ona uma mai ha’u, hein katak kontiua nafatin atu nune’e feto faluk seluk bele hetan mós,” Rosantina hateten.

Xefe suku Fatulia, Angelino Moises Pereira agradese ba Governu ho polítika harii UKL ba povu kbiit laek ne’ebé mak komunidade rasik senti direita ninia benefisiu.

“Senti urgullu no onra tebes tanba hili suku Fatulia ba Uma Kbiit Laek, nu’udar autoridade senti kontenti tebes,” nia katak.

Totál benefisiáriu iha Fatulia hamutuk na’in-tolu hosi aldeia Bahadato komposta hosi benefisáriu Rosantina do Rego de Castro (51), Olandina Cardoso (54) no Regina de S. Perreira (60).

Benefísiariu na’in-tolu ne’e hetan direitu uma medida 48m², kuartu tolu, sala ida, kuziña no sintina ida.

Totál orsamentu ba UKL Fatulia hamutuk $54.108 ne’ebé aloka ba orsamentu fíziku hamutuk $51.000, operasional hamutuk $ 3.000 no fee banku Nasionál Komérsiu Timor-Leste (BNCTL, sigla Portugés) hamutuk $ 108.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here