Traballadór no joven partisipa long march komemora loron-16 ativizmu kontra violénsia bazeia ba jéneru, sesta (26/11). Imajen TATOLI/António Gonçalves

DILI, 26 novembru 2021 (TATOLI)—Konfederasaun Sidikatu Timor-Leste (KSTL), iha sesta ne’e, realiza atividade la’o ain (long march) hosi edifísiu sindikatu Bemori to’o Largo Lecidere, hodi komemora loron-16 ativizmu kontra violénsia bazeia ba jéneru.

Prezidente KSTL, Almerio Vila Nova, konsidera atividade ne’e importante tebes tanba hanesan parte ida atu rekoñese violasaun hasoru feto nu’udar violasaun ba direitu umanu, nune’e ema hotu tenke firme hodi kontra.

Traballadór no joven partisipa long march komemora loron-16 ativizmu kontra violénsia bazeia ba jéneru, sesta (26/11). Imajen TATOLI/António Gonçalves

“Kada tinan ema hotu iha mundu selebra loron-16 ativizmu kontra violénsia bazeia ba jéneru, nu’udar esforsu atu halakon violénsia hasoru feto iha mundu, entaun ohin ita halibur traballadór no joven sira la’o ain hosi Bemori mai to’o Largo Lecidere hodi bele fó informasaun kle’an ba sira saida mak violénsia bazeia ba jéneru,” Prezidente KSTL hateten iha Largo Lecidere.

Notísia relevante: SEII halo abertura kampaña nasionál ativizmu kontra violénsia hasoru feto

Pamfletu iha komemorasaun loron-16 ativizmu kontra violénsia bazeia ba jéneru, sesta (26/11). Imajen TATOLI/António Gonçalves

Nu’udar organizasaun ne’ebé tau-matan ba direitu umanu iha relasaun traballu, tinan ne’e KSTL komemora loron mundiál ne’e ho tema ‘Harii mundu traballu ne’ebé seguru no saudável lahó violénsia no asédiu’.

Iha Timor-Leste dala-barak violénsia hasoru feto no labarik feto sira mosu iha uma-laran, maibé balun akontese iha serbisu fatin.

“Tinan ne’e, rejista kazu traballadór feto na’in-10 hetan violénsia iha serbisu fatin, ne’e inkui estranjeiru ida, ne’ebé ita refere ba Asisténsia Legál ba Feto no Labarik (ALFELA) tanba sira mak asuntu justisa, daudaun prosesu sei la’o hela,” nia dehan.

Traballadór no joven feto partisipa loron-16 ativizmu kontra violénsia bazeia ba jéneru, sesta (26/11). Imajen TATOLI/António Gonçalves

Kazu sira ne’ebé KSTL rejista hanesan feto hetan baku hosi empregadór iha serbisu fatin, tolok, ameasa, inklui kazu imigrante sira ne’ebé la hetan tratamentu dignu hosi empregadór.

Iha fatin hanesan, Sekretária Estadu ba Igualidade no Inkluzasaun (SEII), Maria José da Fonseca Monteiro de Jesus, agradese ba KSTL ne’ebé hola parte ba implementasaun inisiativa spotlight hodi halo kampaña loron-16 ativizmu kontra violénsia bazeia be jéneru.

Pamfletu iha komemorasaun loron-16 ativizmu kontra violénsia bazeia ba jéneru, sesta (26/11). Imajen TATOLI/António Gonçalves

“Ita tenke respeita kontribuisaun feto, hahú hosi uma-laran, tanba bainhira feto kaer serbisu iha uma-laran ita la selu no feto mós bele ajuda mane ba buka osan no ajuda família uma-laran,” nia hateten.

Nune’e, bainhira hakarak livre hosi violénsia iha Timor-Leste, entidade hotu ho responsabilidade tenke hamriik hamutuk hodi luta kontra violénsia hasoru feto no labarik feto.

Atividade ne’e hetan partisipasaun hosi Ilo Community, Un Women, traballadór timor-oan, inklui joven sira.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here