Vise-Prezidente AFO, Julio Coel. Imajen Tatoli/Abílio Elo Nini.

OÉ-CUSSE, 26 novembru 2021 (TATOLI) – FC Becune sei kompete iha kampu batalla ho FC Amor Oébau iha loron 30 novembru hodi hadau-malu títulu kampiaun iha Kopa Asosiasaun Futeból Oé-Cusse (AFO) sub-22 époka 2021.

Vise-Prezidente Asosiasaun Futeból Oé-Cusse (AFO), Julio Coel, fó sai katak, kalendáriu jogu finál ba Kopa AFO sub-22, sei realiza iha loron tersa 30 novembru ne’e, hadau kampionatu ba Kopa AFO sub-22 tinan ne’e, hosi FC Becune ho ekipa FC Amoru Oébau.

“Kalendáriu ba faze finál hadau prémiu ba fatin datoluk sei realiza iha loron segunda 29 novembru semana oin hosi ekipa FC Sarankeu ho ekipa FC Binipu, finál hadau kampionatu tinan ne’e realiza iha tersa 30 novembru, hosi FC Amor Oébau hasoru ekipa FC Becune,” Vise-Prezidente AFO, Júlio Coel, informa ba Agência Tatoli iha kampu futeból Oé-Cusse, sesta ne’e.

Nia hatutan, daudaun ne’e ezekutivu AFO konvida ona FFTL atu asiste direita jogu finál ne’e, inklui autoridade RAEOA atu haree liu ba lala’ok no téknika ne’ebé implementa iha jogu durante ne’e.

Tanba tuir dadus ne’ebé AFO alista iha tinan ne’e, ekipa ne’ebé esforsu partisipa hosi jogu inísiu hamutuk klubu 26, balu hakat liu ba 16 finál, depois ba 8 finál tama to’o 4 finál, ne’ebé termina iha sesta ne’e, hodi ultrapasa ba faze finál maka hanesan, ekipa FC Amor Oébau, FC Becune, FC Sarankeu no FC Binipu.

“Torneiu Kopa AFO ne’e eziste iha Oé-Cusse hodi anima juventude sira iha modalidade desportivu jogu futeból ba idade sub-22 nu’udar jogu rotativa, ne’ebé hahú iha 2019, iha 2020 la reativa tanba situasaun pandemia, nune’e iha tinan ne’e foin mak reativa, hodi envolve klubu hamutuk 26 mak kompete iha Kopa ne’e,” nia katak.

Nune’e, Treinadór FC Amor Oébau, Octaviano Cofitalan, informa nia parte preparadu no iha mehi hakarak sai vitória Kopa AFO ba tinan ne’e. 

Treinadór FC Amor Oébau, Octaviano Cofitalan. Imajen Tatoli/Abílio Elo Nini.

“Ami preparadu hasoru ekipa FC Becune iha finál, ha’u-nia ekipa jogadór sira preparadu kontinua treinu, tanba ekipa FC Becune mós klubu forte tanba esforsu hosi inisíu tama to’o finál. Ha’u orienta liu maka dixiplina, ida-ne’e maka xave atu hetan vitória,” nia tenik.

Nune’e tuir predisaun hosi treinadór FC Becune, Domiziliano Koi, katak, jogu lakon ka manán importante labele halo violénsia ba malu, maibé nu’udar treinadór garante ekipa FC Becune sei hatudu jogu di’ak iha finál Kopa AFO. 

Treinadór FC Becune, Domiziliano Koi. Imajen Tatoli/Abílio Elo Nini.

“Ami prepara ba finál sei hasoru FC Amor Oébau, ami seidauk iha mehi atu sai kampiaun, maibé ami sei esforsu no haka’as-an hosi prepara tuir kbiit no forsa ne’ebé ami iha, maibé jogu furak no kualidade sai valór ba sosiedade maka dixipliña, árbitru sira ho asistente sira inklui jogadór, tenke hatudu profisionál nune’e ita bele garante kualidade desportu iha Oé-Cusse,” nia subliña.

Notisia relevante: Kopa AFO, FC Becune halakon FC Binipu iha 4 finál

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here