Sekretáriu Jerál klube, Karketu Dili FC, Elizeu Isaac. Imajen/Hortencio Sanchez

DILI, 26 novembru 2021 (TATOLI)— Sekretáriu Jerál klube, Karketu Dili FC, Elizeu Isaac, hateten, nia parte otimista manán AD SLB Laulara, hodi rekolla pontu tolu iha jogu jornada datoluk Primeira Divisaun Liga Futeból Timor-Leste (LFTL), ne’ebé realiza iha Sábadu (27/11), iha estádiu Munisipál Dili.

“Ita hatene SLB ekipa boot ho jogadór barak hosi selesaun nasionál ba joga iha liur, maibe jogadór atu senior ka juniór hanesan hotu de’it tanba jogu mak sei determina,” Sekretáriu Jerál ne’e hateten ba jornalista-sira iha edifisiu Liga Futeból Timor-Leste (LFTL) Dili, sesta ne’e.

Iha jogu jornada dahuluk Karketu manán AS Ponta Leste ho rezultadu 1-0 no jornada daruak kontra Assalam manán ho golu 1-0.

Nune’e, ekipa Karketu hahú preparadu hodi enfrenta jogu hasoru SLB no otimista sei rekolla pontu tolu kontra SLB iha jogu jornada datoluk.

Treinadór AD SLB Laulara , Efrem Jerónimo. Imajen/ Hortencio Sanhez

Iha biban hanesan, Treinadór SLB, Efrem Jerónimo, hateten nia ekipa mós otimista rekolla pontu tolu tanba halo ona preparasaun tékniku no fíziku hasoru Karketu.

Maski, nia dehan jogadór SLB maioria ho konidsaun kolen tanba jogu dala-rua tui-tuir malu, maibé garante sei manán Karketu.

“Ami ekipa SLB mós iha otimista atu rekolla pontu tolu hodi halakon Karketu, maibé depende jogu iha minutu 90 mak sei termina,” nia garante.

Notísia Relevante: Ponta Leste prontu kontra Lalenok iha LFTL

Jornalista : Hortencio Sanchez

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here