Governu hahú pagamentu Idozu-invalidés faze daruak ba benefisiáriu sira iha Nítibe. Imajen Tatoli/Abílio Elo Nini.

OÉ-CUSSE, 26 novembru 2021 (TATOLI) – Governu liuhosi Ministériu Solidariedade Sosiál no Inkluzaun (MSSI), hamutuk ho Banku Nasionál Komérsiu Timor-Leste (BNCTL, sigla portugés) realiza pagamentu faze daruak ba idozu no invalidéz 1.309 iha sub-rejiaun Nitibe, Rejiaun Administrativa Espesiál Oé-Cusse Ambeno (RAEOA).

Purtantu, totál benefisiáriu iha pagamentu faze daruak tinan ne’e iha RAEOA hamutuk 6.452 ho montante orsamentu $1,161,360.00 komposta hosi idozu 6.346 valór pagamentu $1,142,280.00 no invalidéz 106 valór pagamentu rihun $19,080.00.

Benefisiáriu iha sub-rejiaun Nítibe hamutuk 1.309 valór pagamentu $235,620.00, sub-rejiaun Pássabe hamutuk 772 valór pagamentu $138,960.00, sub-rejiaun Oésilo hamutuk 1.410 valór pagamentu $253,800.00, no sub-rejiaun Pante Makassar hamutuk 2.961 valór pagamentu $532,980.00.

Nune’e, Xefe Departamentu Solidariedade Sosiál no Inkluzaun (MSSI) RAEOA, Adelino Cau, informa pagamentu faze daruak ba idozu-invalidéz hahú uluk hosi sub-rejiaun Nítibe, tuir kedas ba iha Pássabe ho Oésilo no ensera iha sub-rejiaun Pante Makassar.

“Ita-nia ekipa hosi banku no MSSI halo ona pagamentu iha 22 novembru ne’e hahú uluk iha Nítibe suku lima, Bene-Ufe, Suni-Ufe, Usitaco, Lela-Ufe no Ban-Afi ho totál benefisiáriu hamutk 1.309 valór pagamentu $235,620.00,” Adelino Cau informa ba Agência Tatoli iha Santa Rosa, Oé-Cusse, sesta ne’e.

Nia fó sai katak, modelu ne’ebé ekipa sira uza ba pagamentu daruak ne’e benefisiáriu sira konsentra iha sede suku, ne’ebé akompaña hodi lideransa autoridade lokál no Ofisiál Polísia Suku (OPS) sira, nune’e ba sira-ne’ebé trata ona kartaun ATM iha faze dahuluk, ba foti direita iha fatin ATM ne’ebé BNCTL instala ona iha sub-rejiaun Pante Makassar.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here