Joven kreativu sira. Imajen/Mídia SEJD.

DILI, 26 novembru 2021 (TATOLI)—Governu liuhosi Sekretáriu Estadu Juventude no Desportu (SEJD) apoia orsamentu hamutuk rihun $30 ba grupu joven kreativu suku, hodi implementa programa “Estimulu empreendorizmu sosiál joven kreativu suku”.

“Ohin ita halo lansamentu ba asina akordu servisu hamutuk ho grupu joven kreativu suku, kona-bá programa “Estimulu empreendorismu sosiál joven kreativu suku” ho objetivu sai hanesan naadalan ida atu regulariza grupu sira, hodi nune’e ezekuta fundu ho efetividade. Tanba fundu ne’e apoia hosi Governu, liuhosi Sekretáriu Estadu Juventude no Desportu ho totál rihun $30 hodi fó konfiansa ba sentru Comoro Child and Youth Center hodi implementa,” Jestór Programa Comoro Child and Youth Center, Délio Mali Lopes, hateten ba Agência Tatoli, hafoin akompaña lansamentu asina akordu servisu ba programa “Estimulu empreendorismu sosiál joven kreativu suku”, iha Sentru Comoro Child and Youth Center, Comoro, Dili, sesa ne’e.

B ainhira grupu joven kreativu suku sira asina akordu servisu hamutuk, CCYC kontinua distribui kedas fundu ba grupu sira atu bainhira sira fila bele implementa ona, nune’e bele dezenvolve sira-nia grupu ne’ebé eziste nanis ona.

Programa “Estimulu empreendorismu sosiál joven kreativu suku” antes ne’e, grupu joven kreativu suku hamutuk 34 mak submete proposta mai CCYC, hafoin tama ba iha faze avaliasaun proposta iha grupu 23 mak pasa tanba prenxe kritériu.

“Hosi númeru 23 ne’e iha grupu 22 mak asina akordu no grupu ida la asina tanba la marka prezensa. Entaun, ohin ita distribui ona orsamentu ba grupu sira, nune’e tuir kalendáriu ba planu atividade ne’ebé trasa ona, katak hahú ohin sira hetan ona fundu sira-ne’e. Bainhira sira fila hahú ezekuta daudaun ona, atu nune’e nia ezekusaun ba orsamentu ne’e ita trajetu tarde liu iha 15 dezembru grupu sira tenke submete ona relatóriu mai CCYC,” nia informa.

Kona-ba kritériu ba avaliasaun proposta, nia dehan grupu sira tenke eziste duni iha suku no iha grupu ne’e mós tenke iha transparansia jeneru, entre feto no mane. Alende ne’e, membru grupu ne’ebé eziste minimu ema na’in-neen (6) ba leten.

Hosi ne’e, iha mós kritéria ba programa elejivél ne’ebé atu hetan apoia fundu mak oinsá grupu kreativu sira-nia servisu ne’e halai liubá konservasaun ambiénte, no aliende ne’e mós oinsá sira dezenvolve atividade agrikultura, pekuaria no peska.

Iha ekipa ne’ebé halo avaliasaun ba proposta hamutuk na’in-haat kompostu hosi liña ministériál, mai hosi Ministériu Turizmu, Komérsiu no Indústria (MTCI), Reprezentante Prezidente Autoridade Munisípiu Dili, Reprezentante Sosiedade Sivil no Membru Parlamentu Foinsa’e Timor-Leste.

Enkuantu, grupu 22 mai hosi Dom Aleixo ho grupu hamutuk 14, Vera Crúz grupu lima (5) no Na’in Feto grupu tolu (3). Hosi númeru ne’e, kada grupu simu $7.50 hodi dezenvolve sira-nia atividade kreativu iha grupu.

Koordenadór Grupu Resilise Difesiente Integradu (RDI), Flavio Romalho, sente kontente ho programa estimulu empreendorismu sosiál joven kreativu suku, tanba bele apoia ona sira hodi dezenvolve sira-nia atividade iha grupu.

“Ami-nia grupu hamutuk ema na’in -neen (6) mai hosi ema defisiénsia fíziku no tilun. Nune’e, ho osan ne’ebé ohin simu, ami sei halo ai-funan fatin sira ho nia roda, tanba ho roda ne’e ita bele muda ba mai. Aliende ne’e, ami atu halo mós fatin tau ai-funan ne’ebé tara iha didin-lolon sira ho besi. Tanba, durante ne’e ami halo ona atividade hanesan solda sate fatin, vazu ai-funan no solda kama besi, hosi atividade ne’e ami halo hodi faan fali,” nia informa.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here