Diretór Ezekutivu Serbisu Autónomu Medikamentu no Ekipamentu Saúde (SAMES), Santana Martins. Imajen Tatoli/Francisco Sony.

DILI, 26 novembru 2021 (TATOLI)— Diretór Ezekutivu Servisu Autónomu Medikamentu no Ekipamentu Saúde, Santana Martins, informa, hahú rejista vasina AstraZeneca ne’ebé nia loron validade liu ona iha 9 novembru hamutuk 3.780.

“Vasina AstraZeneca ne’ebé mak liu ona prazu iha 9 novembru hamutuk 3.780 iha armazein, maibé seidauk iha desizaun ka orientasaun klaru hosi Ministériu Saude halo destroisaun,” Diretór SAMES ne’e, informa ba Agência TATOLI iha knaar fatin-Kampu Alór, sesta ne’e.

Alende ne’e, SAMES mós indetifika ona vasina AstraZeneca hamutuk 3.445 ne’ebé nia loron validade  liu iha 30 novembru, nune’e hahú halo distribuisaun ba munisípiu sira atu vasina populasaun molok liu prazu.

Santana Martins esplika tuir prosedimentu vasina ne’ebé liu prazu presiza halo jestaun atubele destroi. 

Nune’e, SAMES hein instrusaun hosi Governu liuhosi Komisaun Interministeriál ba Elaborasaun no Koordenasaun Planu Vasinasaun kontra COVID-19 hodi rekolla atu halo destroisaun.

“Ita prepara hela no tuir planu iha fulan-dezembru halo destroisaun, maibé sei hein desizaun hosi Ministériu Saúde atu rekolla vasina AstraZeneca ne’ebé mak prazu liu iha munisípiu sira ou husik iha ne’ebá mak sira destroi rasik,” Diretór Ezekutivu ne’e akresenta.

Vasina AstraZenca ne’ebé mós liu prazu ona iha 30 outubru hamutuk vial 14,180 iha armazein SAMES.

SAMES atu halo destroisaun presiza iha sasin hanesan Ministériu Saúde, Autoridade Seguransa Inpensaun no Fiskalizasaun Atividade Ekonómika no Sanitária (AIFAESA).

Entertantu, Governu Timor-Leste simu ona vasina COVID-19 hosi doadór sira hanesan COVAX Facility, Nova Zelandia, Austrália, Xina, Portugál no Japaun inklui Estadu Unidu Amérika (EUA) hanesan Vasina AstraZeneca hamutuk 1.012.650, SINOVAC 100.00 no Pfizer 100.620.

Hosi totál ne’e, vasina AstraZeneca no Sinovac no Pfizer ne’ebé fó ona ba sidadaun ho idade 12 ba leten iha territóriu nasionál hamutuk 1,068,839, kompostu hosi AstraZeneca doze 937,365, Sinovac doze 91,572 no Pfizer doze 39,902.

Enkuantu, populasaun elijível tinan 18 ba leten, ne’ebé simu ona vasina to’o iha loron 26 novembru, tuir sistema informasaun Saúde iha Ministériu Saúde, hanesan kumulativu 1ª doze iha Dili 86,1% no kumulativu 2ª doze iha Dili 76,4%.

Enkuantu, Sidadaun iha territóriu nasionál ne’ebé simu ona vasina doze dahuluk iha Timor-Leste 80,4% no simu ona doze daruak 57,8%.

Notísia Relevante: Governu sei destroi vasina AstraZeneca hamutuk 14.180

Jornalista : Felicidade Ximenes

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here