Diretór Ezekutivu FONGTIL, Daniel Santos do Carmo. Imajen Tatoli/Egas Cristovão

DILI, 26 novembru 2021 (TATOLI)—Forum Organizasaun Naun Governamentál Timor-Leste (FONGTIL), preokupa Governu aprova pagamentu estraordinária ajente administrasaun públiku, tanba membru Governu hetan saláriu boot maibé sei hetan subsídiu iha tempu Natal.

“Ba funsionáriu públiku konsidera sira hanesan traballadór, tanba tuir kodigu laborál Timor-Leste katak tenke hetan pagamentu ba sira antes 20 dezembru. Maibé, buat ida-ne’ebé ita kontra iha ne’e mak ita dehan ita-nia orgaun soberania haat ne’e laiha moral. Se bainhira sira mós hakarak simu hotu subsídiu (bonus) Natal nina ne’e, injustisa iha ne’e,” Diretór Ezekutivu, Forum Organizasaun Naun Govermentál Timor Leste (FONGTIL), Daniel Santos do Carmo, hateten ba jornalista sira iha Salaun Luz Clarita, Bairo Farmoza, Dili, sesta ne’e.

Injustisa, nia dehan, tanba sira-nia saláriu ne’e boot, tanba se ema simu osan rihun $3 ba leten iha rai ida-ne’e, ne’e kategória dehan boot. Serake ida-ne’e seidauk to’o, entaun sira problema iha morál.

“Sira halo dekretu-lei hodi asegura sira-nia interese, sira-nia morál kona-ba polítika poupansa, la merese Deputada no Ministru ida simu subsídiu iha Natal. Tanba sira dedikadu sira-nia an ho kompromisiu ida-ne’ebé ema fó ba sira atu serve, la’os atu ba halo dekretu-lei hodi asegura an. Satán asesór funsionáriu konfiansa polítika, sira-ne’e mós hetan hotu ne’e ita ko’alia dehan injustisa, maibé ba funsionáriu públiku sira iha direitu hanesan traballadór. Ho ida-ne’e, ha’u hanoin tenke hadi’a, labele promove polítika ida-ne’ebé kontribui ba má gastu,” nia esplika.

Entretantu, iha loron kuarta (24/11) ne’e Governu liuhosi reuniaun Konsellu Ministru (KM) aprova Projetu Dekretu-Lei ne’ebé aprezenta hosi Ministru Finansa, Rui Augosto Gomes ba pagamentu estraordináriu saláriu adisionál fulan ida (13o) ba funsionáriu, ajente no kontratadu administrasaun públiku iha fulan dezembru.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here