Membru Forum Haburas Moris (FHM)no organizasaun sosiedade sivil sira, foto hamutuk ho kargu xefia munisípiu ho autoridade lokál no komunidade Maliana. Imajen Tatoli/Sérgio da Cruz.

BOBONARO, 26 novembru 2021 (TATOL) – Fundasaun Haburas Moris (FHM), sesta ne’e, organiza diálogu transformasaun jéneru iha kultura, arte no justisa ba kargu xefia kada setór sira munisípiu, autoridade lokál no juventude sira iha postu administrativu Maliana, munisípiu Bobonaro.

Objetivu hosi diálogu ne’e, atu rona preokupasaun hosi autór importante ne’ebé tama iha tarjetu inisiativa spotliht iha nível baze kona-ba perspetiva transformasaun jéneru iha nível baze. Nune’e mós atu komemora loron 16 kampaña aktivizmu hapara violénsia kontra feto no labarik feto sira.

Ofisiál Ligasaun Instituisionál no Advokasia Asia Justice and Rights (AJAR), Inocençio de Jesus, informa liuhosi aktividade ne’e atu transforma valór kulturál no halo balansu iha prinsípiu igualidade hodi aposta ba Konstituisaun RDTL artigu 16 ne’ebé ko’alia kona-ba prinsípiu igualidade no universál. Nune’e mos artigu 2 kona-ba lisan no tradisaun hodi kria família ne’ebé prósperu iha valór respeitu malu.

“Ita halo diálogu oinsá atu transforma no fó mensajen iha arte, transforma valór kulturál ne’ebé atrativu hodi haburas kultura igualdade jéneru liga ba valór arte no valór normativu sira hodi mellora di’ak liután entre kultura no lei pozitivu sira iha família no sosiedade,” nia ko’alia iha salaun administrasaun postu administrativu Maliana, sesta ne’e.

Matéria ne’ebé diskute iha diálogu ne’e mak hanesan, prátika programa transformasaun jéneru ba atitude liuhosi arte no kultura, prátika transformasaun grupu mane nune’e bele hatene kle’an oinsá atu fó lisensa ba feton, ferik-oan no subriña atu kontribui ba dezenvolvimentu iha nível baze.

“Ita presiza serbisu maka’as hodi empodera feto maluk no labarik feto sira inklui mane sira, oinsá mak atu fó biban ba maluk feto sira bele foti desizaun, bele sai emprezáriu ruma, bele kria grupu no sai lideransa iha prosesu dezenvolvimentu nasionál,” nia subliña.

Biban ne’e, Sekretáriu Autoridade Munisípiu Bobonaro, Júlio Carvalho Caero, Louva inisiativa hosi FHM ho organizasaun sosiedade sivíl sira-ne’ebé envolve iha membru konsórsiu, tanba iha ona interese luta ba  feto vulnerável no labarik feto sira-nia direitu. Nune’e mós iha ona hanoin atu transforma valór no kulturál sira iha baze hodi kontribui ba dezenvolvimentu nasionál.

“Ha’u apresia ho diálogu ida-ne’e, tanba iha Bobonaro violénsia doméstika aas, kauza hosi norma kulturál sira hotu, feto folin karun, la’en baku no família intervein, ne’ebé husu ba partisipante sira atu tau hamutuk ideia ida de’it atubele transforma iha livru sai bukae no matadalan hodi sosializa ba komunidade hotu,” nia dehan.

Ana Maria nu’udar partisipante sente kontente bele hetan oportunidade partisipa iha diálogu ne’e, tanba hetan informasaun foun hosi sosiedade sivíl sira hodi hakbiit koñesimentu no motiva atu sai feto ne’ebé bele hola parte iha kualkér atividade hanesan ho mane.

“Ha’u espera katak liuhosi diálogu ne’e bele lori ami-nia ideia sira-ne’e ba iha nai ulun sira, atubele promove jéneru iha arte no kultura, atu ami (feto) bele iha direitu asesu ba kualkér atividade,” nia katak.

Programa ne’e realiza hosi Fundasaun Haburas Moris serbisu hamutuk ho organizasaun sosiedade sivil 21 ne’ebé envolve iha membru konsórsiu aprende hamutuk. Programa ne’e apoia fundu hosi UN Woman, ne’ebé nu’udar inisiativa hosi spotlight hodi hametin kapasidade organizasaun sosiedade sivil nia luta kombate violénsia kontra feto no labarik feto.

Jornalista: Sérgio da Cruz

Editor: Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here