Estudante sira atu tuir kompetisaun kulturál hodi eprezenta poezia no hatais tais hosi post no suku sira iha Covalima nia identidade. Imajen Tatoli/Celestina Teles.

COVALIMA, 26 novembru 2021 (TATOLI)—Prezidente Komisaun Organizadora 28  Novembru, Francisco de Jesus Alves, informa atu komemora loron proklamasaun independénsia 28  Novembru ba dala-46 (28 novembru 1975-28 novembru 2021) iha Covalima hahú hala’o ona atividade sira hanesan kompetisaun kulturál, feira no bazar kalan.

“Ami-nia sesaun sira preparadu hotu ona iha atividade  balun mak ita hahú ona hanesan  feira  no  bazar kalan no mós kompetisaun kulturál,” Francisco Alves informa ba Agência Tatoli iha  salaun  Administrasaun Covalima, sesta ne’e. 

Atividade ne’e komisaun sira mós hala’o atividade desportu hodi haree liu ba desportu tradisionál. 

“Ita tau osan uitoan ba atividade desportu maibé ita halo desportu tradisionál mak hanesan dada  tali, hadudu, tutur lolo hanesan desportu tradisionál ne’ebè mak ita-nia inan-aman no bei’ala sira hala’o nanis ona. Ohin, atu festeza loron 28 Novembru ita hamosu fali, nune’e ita-nia bei’oan sira hodi kontinua fali hanesan patrimóniu Covalima nian,” nia dehan. 

Ba atividade hirak ne’e, komisaun organizadór aloka orsamentu ba atividade feira no bazar kalan hamutuk $500, animasaun kulturál $600 no ba atividade desportu $2,230.00.

Kompetisaun kulturál

Entretantu, iha kinta ne’e, Vise-Ministru Edukasaun Juventude no Desportu, António Guterres halo abertura ba kompetisaun kulturál ne’ebé involve estudante sira hosi eskola sekundária jerál no tékniku vokasionál sira iha Covalima.

Estudante sira atu tuir kompetisaun kulturál hodi eprezenta poezia no hatais tais hosi post no suku sira iha Covalima nia identidade. Imajen Tatoli/Celestina Teles.

“Iha kompetisaun estudante sira hala’o atividade kulturál ida-ne’e hola parte ida atividade hosi komemora loron proklamasaun  independénsia Timor-Leste 28 Novemrbu,” Vise-Ministru Edukasaun Juventude no Desportu ne’e jornalista sira bainhira halo abertura ba atividade  kompetisaun  kulturál iha salaun  Eskola Sekundáriu Jerál Covalima.

Governante ne’e hateten, aprezentasaun kulturál ida-ne’e nu’udar mós aprezenta Timor-Leste nia identidade liuhosi hatais tais ne’ebé reprezenta postu administrativu no suku sira ne’ebé naklekar iha Covalima 

“Ha’u orgullu, ohin ha’u haree hosi tais estudante sira hatais reprezenta kultura hosi postu administrativu no suku sira ida-idak,” nia dehan.

Xefe Sesaun Animasaun Kulturál, Rui Amaral Suri Seran, hateten kompetisaun kulturál ne’e aprezenta hosi estudante hosi Eskola Sekundária Jerál Covalima, Eskola Sekundária Ave Maria Suai, Eskola Tékniku Vokasaun Kristál Akar Laran iha ámbitu atu komemora loron proklamasaun independénsia. 

Durante realiza kompetisaun kulturál ne’e estudante sira aprezenta hodi hatais tradisionál (traze), aprezenta poezia no grupu korál (vokál grupu). Durante ne’e, sesaun rejista traze parseiru 12, poezia individual 12, grupu korál 12 ne’ebé hala’o durante loron rua nia laran.

“Kompetisaun kulturál ne’e ami hala’o durante loron rua no sira-ne’ebè sai vensedór sei hetan prémiu osan,” nia informa.

Jornalista : Celestina Teles

Editór      : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here