Reitór UNTL, João Soares Martins. Imajen TATOLI/Francisco Sony

DILI, 25 novembru 2021 (TATOLI)–Fakuldade Edukasaun, Arte no Umanidade (FEAH, sigla portugés), kursu Tetun hosi Universidade Nasionál Timor-Lorosa’e (UNTL) realiza semináriu internasionál kona-ba lian no kultura ho intensaun atu transforma komunikasaun iha sosiedade nia le’et.

“Bainhira ita atu halo mudansa iha lian, ita tenke halo peskiza atu hatene mudansa saida mak akontese ba ita-nia lian ne’ebé uza ba komunikasaun loron-loron,” Reitór UNTL, João Soares Martins, hateten iha Auditóriu kampus Liseu, foin lalais ne’e.

Tuir Akadémiku ne’e, lian tetun, inglés no portugés sai fonte importante tebes atu lori ema bele halo komunikasaun ho fonte sira seluk.

“Lian tetun daudaun ne’e akumula liafuan hosi lian oioin. Ida-ne’e mak lori transformasaun ida atu hatene mudansa iha sosiedade ohin loron,” nia akresenta.

Nu’udar Instituisaun Ensinu Superiór ida, UNTL prontu apoiu FEAH prepara departementu tetun ne’e ho di’ak, nune’e tinan oin mai, depende ba vontade no disponibilidade profesór sira bele konvoka konferénsia ida.

Nune’e mós, Diretór Sentru Estudu Kulturál no Arte (SEKA), Vicente Paulino, hateten, eventu ne’e FEAH tetun mak organiza ho objetivu atu promove traballu profesór no estudante sira.

“Semináriu ne’e, profesór hotu esforsu-an atu aprezenta sira-nia matéria, tanba sira rasik ho vizaun ida katak kuandu iha ona traballu tenke públika,” Vicente Paulino dehan.

Ámbitu ne’e nu’udar parte integradu atu promove edukasaun nu’udar ensinu peskiza, ne’ebé obriga profesór sira halo esforsu halo aprezentasaun.

Enkuantu, peskizadór ne’ebé aprezenta traballu iha semináriu ne’e mai hosi profesór departementu lian tetun, profesór brazileira no portugés, hosi kursu formasaun profesór, departementu pre-eskolár inklui Fakuldade Siénsia Sosiál.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here