Sekretáriu Estadu Formasaun Profisionál no Empregu (SEFOPE), Alarico do Rosário, hasai retratu hamutuk ho formandu STVJ Gleno. Imaje/Espesiál.

DILI, 25 novembru 2021 (TATOLI)-Sekretáriu Estadu Formasaun Profisionál no Empregu (SEFOPE), Alarico do Rosário ho nia ekipa halo observasaun direta ba ekipamentu prátika iha Sentru Treinamentu Vokasionál Juventude (STVJ) Gleno.

“Sekretáriu Estadu ho nia ekipa hala’o vizita mai ami-nia sentru formasaun STVJ Gleno hodi observa direta ba formasaun ne’ebé durante ne’e la’o no iha momentu ne’e sira mós haree ita-nia ekipamentu balun ne’ebé sei menus hela hodi tau ba planu orsamentu 2022 atu sira bele suporta fila-fali ba sentru ne’e,” Diretór Sentru Treinamentu Vokasionál Juventude (STVJ) Gleno, Carolino Alves, hateten ba Agência Tatoli, via telefónika, kinta ne’e.

Ekipamentu ne’ebé daudaun ne’e iha STVJ Gleno hanesan komputadór, hand tracktor ne’ebé suporta ba área hortikultura no ekipamentu ospitalidade hanesan mákina kafé no produsaun hahan ne’e sufisiente ona maibé sala-de-aula mak menus.

“Sala-de-aula mak menus tanba iha momentu ne’ebá sira (SEFOPE) identifika kedas hanesan aula ba prátika sei menus, entaun ida ne’e sira tau iha prioridade ba orsamentu 2022 atu bele suporta fila-fali,” nia reafirma.

Aula prátika sei menus tanba STVJ Gleno planea loke fali área formasaun foun hanesan barista, língua inglés no korea, tanba daudaun ne’e sentru refere iha aula tolu hodi tau formandu sira aprende ba área ospitalidade, administrasaun no hortikultura.

“Tanba ne’e, ami persiza tulun hosi SEFOPE hodi bele finansia STVJ-Gleno aumenta tan aula atu ami bele realiza planu ne’ebé iha,” nia informa.

Aleinde vizita, Sekretáriu Estadu Formasaun Profisionál no Empregu, fahe mós informasaun no motiva formandu sira hodi fó importánsia ba futuru, liuhosi hakaas an hodi aprende.

“Nasaun hein hela ita-boot sira-nia matenek ho kualidade atu dezenvolve ita-nia rain. Se ita-boot sira la esforsu atu aprende, neneik ita-nia nasaun adere ba ASEAN no kompetisaun boot ba asesu serbisu iha kampu traballu, ita sira sei sai hanesan haree-na’in iha Timor-Leste.

Ekipa ne’ebé vizita Sentru Treinamentu Vokasionál Juventude (STVJ) Gleno ne’e kompostu hosi Sekretáriu Estadu Formasaun Profisionál no Empregu Alarico do Rosário, Diretór Jerál Sekretaria Estadu Formasaun Profisionál no Empregu (SEFOPE) Paul Alves no Diretór Nasionál Formasaun Profisionál (DNFP) Mateus dos Santos.

Entretantu, totál formandu iha Sentru Treinamentu Vokasionál Juventude (STVJ) Gleno hamutuk 66 ne’ebé tuir formasaun iha Hortikultura, Hospitalidade no Administrasaun.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here