Autoridade RAEOA kuarta ne’e lansa ona website hodi promove turizmu komunitária iha RAEOA. Imajen mídia RAEOA/ZEESM.

OÉ-CUSSE, 25 novembru 2021 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) liuhosi Unidade Turizmu Komunitária, kuarta ne’e lansa website www.visitoecussetl hodi promove atividade turizmu komunitária iha rejiaun ne’e.

Programa ne’e dezeña hosi Unidade Turizmu Komunitáriu serbisu hamutuk ho United Nations Development Programme (UNDP), kria programa mak hanesan livru brosura, arte pintura no informasaun atividade ba fatin turizmu RAEOA nian

“Programa tolu ne’e nia objetivu atu promove atividade turizmu Oé-Cusse ba komunidade lokál nasionál no internasionál, nune’e bele fasilita vizitór sira-ne’ebé hakarak vizita Oé-Cusse, entaun ita kria ona website, nune’e hafasil asesu atividade sira-ne’ebé eziste iha Oé-Cusse,” Koordenadór Unidade Turizmu Komunitária, Nene Almeida, informa ba Agência Tatoli, iha Palaban, Oé-Cusse, kinta ne’e.

Nia fó sai katak, programa tolu ne’e sei instala liuhosi website www.visitoecussetl hodi fornese informasaun ba públiku nune’ebele konsumu no asesu atividade turizmu ba setór hotu-hotu hanesan kultura, desportu, fatin istóriku sira iha Oé-Cusse, transporte aéreu, marrítima.

Nune’e mós terrestre, ótel, restaurante, nune’e ajuda vizitór sira bainhita vizita tanba atividade hotu sei envolve iha laran kompleta ho rezidénsia no enderesu inklui fatin sira seluk ne’ebé eziste iha Oé-Cusse.

Unidade Turizmu Komunitária ne’ebé tutela iha Gabinete Prezidente Autoridade halo produsaun brosura liuhosi livru, atu atualiza informasaun eskrita hodi promove atividade turizmu nian, nune’e fasílita vizitór ne’ebé la konsege asesu iha website bele asesu liuhosi livru brosura ne’e.

Ativividade turizmu halo ho pakote, tanba iha programa arte pintura, halo dezeña atu atrai vizitante sira inklui juventude hodi hasai letratu tanba arte pintura maioria uza imajen istória, hanesan fatin no lidér istóriku nasaun nian, nune’e liuhosi website ne’e envolve hotu atividade hirak-ne’e, fasil ba ema hotu asesu.

Reprezentante Prezidente Autoridade RAEOA atuál Sekretáriu Rejionál ba Asuntu Komérsiu no Indústria, Pedro da Silva Boquifai, agradese ba atividade ne’e tanba promove atividade turizmu importante tebes iha rejiaun ne’e.

“Ne’e fasilita ita-nia vizitante sira iha rai seluk hakarak viajen mai Oé-Cusse, ajuda sira bele asesu iha website ne’e, bele asesu iha livru brosura, nomoos ha’u haree iha mós atividade arte pintura. Ida-ne’e mak ita-nia rikusoin Oé-Cusse presiza promove beibeik ita-nia fatin turizmu tanba ne’e rikusoin Oé-Cusse nian,” nia orgullu.

Jornalista       : Abílio Elo Nini
Editór             : Evaristo Soares Martins 

PUBLISIDADEiklan

HAKEREK NO HATÁN

Please enter your comment!
Please enter your name here