Autoridade RAEOA vizita fatin artezenatu ne'ebé fa’an iha bazar kalan. Imajen Tatoli/Abílio Elo Nini.

OÉ-CUSSE, 24 novembru 2021 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), konsidera feira nu’udar meiu rekupera ekonomia komunidade nian iha rejiaun ne’e.

Iha kuarta kalan, Autoridade RAEOA hahú abertura feira durante loron 16, hahú hosi 24 novembru to’o loron 09 dezembru, atu festeza loron Juventude Nasionál no loron Proklamasaun Independénsia Unilaterál 28 Novembru ba dala-46.

“Tanba atividade feira kalan ne’e hanesan meiu ida atu rekupera fali komunidade sira-nia ekonomia, liuhosi fa’an sira-nia produtu lokál no artezenatu inklui produtu seluk ne’ebé komunidade prodús,” Sekretáriu Rejionál ba asuntu Komérsiu no Indústria, Pedro da Silva Boquifai, koa’lia iha RAEOA.

Nia haktuir, iha situasaun COVID-19 Governu la autoriza komunidade atu hala’o atividade ekonomia iha fatin hotu-hotu, inklui jogus no atividade edukasaun mós paradu.

“Tan ne’e maka ita haree kazu kuaze menus, entaun autoridade hakarak fó tempu ba komunidade atu hala’o nia movimentu hanesan ohin kalan ita abertura bazar kalan ne’e, durante loron 16 to’o 9 dezembru,” nia katak.

Nia apela ba juventude ferik no katuas, serbisu hamutuk ho parte seguransa nune’e bele garante bazar kalan ne’e la’o di’ak.

Komandante Polísia Unidade Operasionál RAEOA, Inspetór Xefe Bernardo Freitas, fó sai katak, seguransa apoia másimu atividade bazar kalan ne’e hodi fó espasu ba komunidade promove no fa’an produtu ho livre.

“Ha’u husu ba ita hotu bainhira iha problema, presiza komunikasaun ho komisaun hodi buka solusaun no rezolve tuir mekanismu komisaun nian, ita hadomi Oé-Cusse, hadomi ita-nia inan-aman ne’ebé mai lori produtu tau iha bazar kalan ne’e,” nia fó hanoin.

Entretantu, atividade prinsipál ne’ebé hala’o iha bazar kalan ne’e maka hanesan, promove produtu lokál, autoriza jogu bola-guling no kuru-kuru.

Nune’e mós realiza kompetisaun long mars, kadi kakutak prioridade ba ensinu báziku terseiru siklu, kompetisaun solu vokál, kompetisaun hakerek istória, diskursu ba eskola sekundáriu, kompetisaun promove produtu lokál, artezenatu, restaurante, inklui kompetisaun ba fatin fa’an sasán (stand). Atividade hirak-ne’e Autoridade RAOEA prevista montante orsamentu rihun $10.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

1 KOMENTÁRIU

  1. Konseitu rekoprasaun ekonomia laos husi feira deit nunee rekopera ona ekonomia iha RAEOA maibe lolos nee konseitu rekoperasaun ekonomia liu husi konseitu ida neebe bele iha sustetabilidade ekonomika povu atoni

HAKEREK NO HATÁN

Please enter your comment!
Please enter your name here