Arsebispu Arkidioseze Metropolitana Dili, Dom Virgílio do Carmo da Silva. Imajen Tatoli/Francisco Sony.

OÉ-CUSSE, 25 novembru 2021 (TATOLI) – Ohin,Arsebispu Arkidioseze Metropolitana Dili, Dom Virgílio do Carmo da Silva, sei fó bensaun ba fatin turizmu kulturál iha área Nunuhenu, Rejiaun Administrativa Espesiál Oé-Cusse Ambeno.

Nune’e, iha loron kuarta ne’e, Autoridade RAEOA konvida ona lian na’in-sira mai hosi suku 18 hamutuk ho liurai da Cruz no da Costa, iha RAEOA, realiza ona serimónia kulturál sunu-lilin hodi husu matak-malirin molok konstrui fatin turízmu kulturál iha área Nunuhenu ne’e.

Fatin turízmu kulturál Nunuhenu, lokaliza iha aldeia Noeninen, suku Cunha, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA).

Liurai da Costa atuál Sekretáriu Rejionál Asuntu Terra no Propriedade, António Hermenegildo da Costa, fó sai katak, konstrusaun fatin kulturál ne’e sei konstrui uluk kapela, moru, portaun, postu seguransa kompleta ho fasilidade sanitária.

Nune’e molok halo kontrusaun, konvida lian-na’in sira hosi suku 18, Igreja no autoridade realiza uluk sunu-lilin hodi husu matak-malirin, tanba sei hetan bensaun hosi Arsebispu Arkidioseze Metropolitana Dili, Dom Virgílio do Carmo da Silva.

“Ita halo serimónia ne’e atu husu lisensa ba bei-ala sira atu fó matak-malirin ba konstrusaun ne’e, tanba ohin autoridade halo lansamentu, tanba kontrusaun ne’e fatin istóriku ba suku 18 tantu hosi rai boot inklui nasaun viziñu sira,” António Hermenegildo da Costa, informa ba Agência Tatoli iha Nunuhenu, Oé-Cusse, kinta ne’e. 

Ohin, Dom Virgílio fó bensaun ba turizmu kulturál iha RAEOA

António Hermenegildo da Costa nu’udar liurai konsidera sunu-lilin ne’e iha sinál hatudu katak obra ne’e sei la’o di’ak no susesu.

Entretantu, projetu ne’e ezekuta hosi empeza Grand Enclave Unipesoál Lda, ho valór kontratu $440,843.10, ne’ebé aloka hosi Orsamentu Jerál Estadu (OJE) 2021.

Notisia relevante: Arsénio konvida PM Taur lansa konstrusaun turizmu kulturál iha RAEOA

Jornalista          : Abílio Elo Nini
Editór                : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here