Ofisiál PNTL-F-FDTL hasai retratu hamutuk ho administradór Covalima, Francisco de Andrade. Imajen Tatoli/Celestina Teles.

COVALIMA, 25 novembru 2021 (TATOLI)—Ofisiál Polísia Nasionál Timor-Leste (PNTL) no FALINTIL-Forsa Defeza Timor-Leste (F-FDTL) halo peskiza iha munisípiu Covalima hodi kompleta sira-nia kursu iha Institutu Defeza Nasionál Timor-Leste (IDN-TL).

Notísia Relevante: IDN-TL oferese kursu CEMCI ba superiór PNTL no F-FDTL

“Ami mai vizita ho objetivu prinsipál ida mak Institutu Defeza Nasionàl (IDN) ho dekretu-lei liuhosi Konsellu Ministru númeru 12/2010, 27 agostu, hatuur nia misaun atu dezenvolve pensamentu no planeadór estratéjiku atu dezenvolve,” Diretór Institutu Defeza Nasionàl Timor-Leste (IDN-TL), Guilherme Soares, hateten ba jornalista sira iha salaun Administrasaun Covalima, kinta ne’e.  

Atu dezenvolve pensamentu no planeadór estratéjiku liuhosi ensinu estudu, investigasaun, debate kona-ba asuntu defeza no seguransa nian, promove ka promulga relasaun asuntu seguransa no defeza. 

Hafoin Partisipa kursu durante fulan tolu, asuntu hirak ne’e hanesan kursu ikus hosi sira-nia traballu finál, hodi alunu sira dezenvolve traballu individuál liuhosi kurikulár ne’ebè sira hetan. 

“Durante sira tuir formasaun iha duni rezultadu bele halo estudu kona-ba sosio ekonómiku no bein star sosiál no ekonómiku,” nia hateten.  

Objetivu prinsipál hosi defeza segurança nasionàl nian mak oinsá atu halo hamutuk instituisaun PNTL no F-FDTL iha uma mahon, doutrina, hanoin ida ba Estadu no Nasaun nian. 

Administradór Munisípiu Covalima, Francisco de Andrade, hato’o bem-vindu no agradese ba ofisiál PNTL no F-FDTL atu hala’o peskiza iha Covalima hodi kompleta sira-nia estudu.

Administradór ne’e, husu ba ofisiál PNTL no F-FDTL sira bainhara tun ba terreñu atu halo koordenasaun di’ak ho autoridade lokál sira, nune’e bele fó rezultadu di’ak. 

Antes ne’e, ofisiál PNTL no F-FDTL sira ne’e partisipa partisipa Kursu Estadu Maiór Konjunta no Integradu (CEMCI, sigla portugés) besik tinan ida, no Kursu Pos-Graduasaun Estudu Estratéjiku no Reziliénsia Nasionál (PGEERN, sigla portugés) durante fulan tolu.

Alunu sira-ne’e mai hosi ofisiál PNTL no F-FDTL ho Funsionáriu Superiór balun hosi Ministériu Negósiu Estranjeiru no Kooperasaun (MNEK), Ministériu Interiór (MI), Ministériu Defeza (MD) hamutuk nain-19, tun ba terenu hodi halibur dadus iha munisípiu Covaima hodi kompleta sira-nia estudu iha Institutu Defeza Nasionál Timor-Leste (IDN-TL).

Tuir oráriu ne’ebé definidu, hahú 22 novembru to’o 22 dezembru tinan ne’e, alunu sira sei akompaña hosi IDN hala’o sira-nia viajen hosi Kapitál Dili ba munisipiu Manufahi, Covalima, Bobonaro no RAEOA.

Notísia Relevante: Governu prevee millaun $30 konstrui Universitáriu Defeza Nasionál

Atividade peskiza ne’ebé sira hala’o mak halibur dadus iha Komandu PNTL, Administradór Munisipal, fatin Futuru harii petrolíferu, Postu Unidade Polisia Maritima (UPM), Postu Unidade Polisia Fronteira (UPF), Postu F-FDTL sira iha vila no liña fronteira sira.

Entretantu, matéria ba kursu CEMCI ne’ebe alunu sira aprende ona ba komponente formasaun tolu hanesan komponente formasaun baze, komponente formasaun espesifika, no komponente formasaun konjunta no estratéjia hakat ona ba Kursu  Pos-gradusaun ho nia lema formasaun ‘Estratejia ba futuru sustentável, hodi kontinua ho materia metodologia investigasaun sientífika estudu estratéjiku’.

Totál graduadu ne’ebè finaliza ona Kursu Estadu Maiór Konjunta no Integraduu (CEMCI) ba periódu dahuluk iha tinan 2018 hamutuk na’in-neen (6) kompostu hosi Tanente Koronel na’in-rua (2), Kapitaun Fragata na’in-ida (1), hosi komandu F-FDTL no superintendente asistente na’in-tolu no na’in tolu (3) hosi komandu PNTL. 

Graduadu ne’ebé gradua ba Kursu PGEERN hahú Primeiru Kursu iha Tinan 2017 to’o IV Kursu  Tinan 2020 hamutuk ema na’in-103 no ba V Kursu  ne’e hamutuk partisipante na’in-18.

Finalidade hosi formasaun proporsionál ba kuadru, ba superiór sira hosi administrasaun públika, ofisiál superiór militar, polisia no ajente sosiedade sivil sira iha atualizasaun no aprofundamentu ba koñesimentu sobre realidade nasaun nian iha kontestu lokál, rejionál no mundiál. 

Durante atividade kursu rua ne’e la’o, IDN hala’o kooperasaun hamutuk Universidade Lisboa Portugál no Universidade Nacional Timor Lorosa’e (UNTL) hodi fasilita dosente sira hodi hanorin.

Notísia Relevante: IDN ho UNTL Estabelese Kooperasaun ba Kapasitasaun Defeza no Seguransa

Jornalista : Celestina Teles

Editór         : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here