Liña telekomunikasaun. Imajen/Espesiál.

COVALIMA, 25 novembru 2021 (TATOLI)—Maske Timor-Leste besik tinan 20 ona maibé komunidade suku Ogues, postu administrativu Maucatar, munisípiu Ccovalima susar atu asesu liña telekomunikasaun ho di’ak.  

Komunidade suku Ogues, Maria da Cruz, husu autoridade lokál haruka karta ba operadór telekomuunikasaun Timor Telekom, Telemor no Telekomcel atu instala tore atu fasilita populasaun sira ne’ebé besik iha Suai Vila maibè defisil tebes atu asesu rede, tanba bainhira atu komunika hodi ko’alia ba malu tenke buka rede. 

Ami husu ba ita-nia autoridade lokál sira hato’o karta ba operadór telekomunikasaun tolu ne’ebé mak eziste iha Timor-Leste mai atu halo survei. Ami iha ne’e defisil tebes asesu ba rede komunikasaun durante tinan 20-resin ona,” Maria da Cruz informa ba Agência Tatoli, iha suku Ogues, kinta ne’e.  

Nia reprezenta populasaun iha suku Ogues hodi husu Governu atu buka solusaun ba povu nia preokupasaun ne’ebé susar tebes asesu ba liña telekomunikasaun. 

Administradór munisípiu Covalima, Francisco de Andrade, rekuñese populasaun hosi suku Ogues nia preokupasaun la asesu rede hosi operadór telekomunikasaun tolu iha Timor-Leste hanesan operadór Timor Telekom, Telemor no Telekomcel. 

“Ha’u lahatene sira maka la tau antena ka tore ruma iha suku refere. Loos no tebes duni katak populasaun sira iha suku Ogues la asesu liña komunikasaun tanba rede laiha tebes. Entaun, ha’u sei halo planu hodi ba hasoru jerente operadór telekomuunikasaun tolu ne’e,” nia informa. 

Iha tempu badak, autoridade munisipál ne’e sei halo aproximasaun no presiza ko’alia ho jerente operadór telekomuunikasaun sira-ne’e.

Enkuantu, suku Ogues ho nia populasaun hamutuk 3,104 ne’ebé to’o otras ne’e lá asesu liña telekomunikasaun durante tinan 20 resin.  

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here