Prezidente Komisaun C (Finansa Públika), Deputada Maria Angélica Rangel. Imajen Tatoli/Egas Cristovao

DILI, 25 novembru 2021 (TATOLI)–Komisaun C trata asuntu Finansa Públika liderada Deputada Maria Angélica Rangel, sei aprova relatóriu no paresér kona-ba faze audiénsia públika ba proposta lei Orsamentu Jerál Estadu (OJE) 2022, iha 29 novembru ne’e.

Deputada Maria Angélica hateten, komisaun C ninia audiénsia públika ho entidade públika  mak termina ikus liu, nune’e hahú  iha loron 22 novembru to’o 25 novembru ne’e, prazu ba  atu komisaun espesializada hotu submete ninia relatóriu paresér ba komisaun.

“Agora daudaun asesór no tékniku sira sei servisu karik, aban bele termina hodi hetan ezbosu ida atu nune’e distribui ba deputadu sira hotu atu halo leitura. No, tuir ajenda komisaun sei halo aprovasaun iha loron 29 novembru loron tomak, atu nune’e relatóriu pasa ka la pasa, iha 30 novembru komisaun sei lori ba meza plenária,” Deputada ne’e hateten ba jornalista sira iha Parlamentu Nasionál, kinta ne’e.

Bainhira iha mudansa oráriu loron ida ka rua ne’e, kompetensia Parlamentu Nasionál nian tanba sei iha dezlokasaun deputadu sira-nian hodi partisipa komemorasaun loron proklamasaun 28 novembru iha munisípiu Baucau.

Prezidente Komisaun C ne’e haktuir, durante iha audiénsia públiku entidade sira relata progresu ezekusaun OJE 2021 no sira-nia proposta lei OJE ba 2022.

“Maibé ita haree katak sira-nia preokupasaun mak orsamentu balun la pasa iha Komite Revizaun Orsamentu Polítika (KROP) no sira husu Parlamentu Nasionál atu konsidera. Tinan ida-ne’e, ita-nia orsamentu ne’e la’ós haree ba ministériu no la’ós haree ba item, maibé haree ba programa,” nia dehan.

Nia seida’uk bele fó sai uluk paresér ne’ebé sei rekomenda ba plenária tanba sei hein aprovasaun komisaun nian.

Bainhira komisaun aprova ona relatóriu no paresér sei submete ba iha meza Parlamentu Nasionál hodi halo ajenda diskusaun ba jeneralidade no espesialidade.

Parlamentu Nasionál sei diskute proposta lei Orsamentu Jeral Estadu (OJE) 2022 hamutuk bilaun $1,675, hosi montante ne’e millaun $233 ba saláriu no vensimentu, millaun $449,98 ba bens servisu, millaun $565,9 ba transferénsia públika, millaun $24,4 koresponde ba kapitál menór no millaun $401,7 ba kapitál dezenvolvimentu.

Iha planu anual Governu nian 2022 reflete kontinuasaun servisu reforma jestaun finansa públika, ne’ebé susesivu Governu nian liuhosi roteiru orsamentasaun kada programa.

Bazea ba livru 2 planu annual OJE 2022 integra programa hamutuk 45, sub-programa 477 no totál atividade 2,445.

Kuadru Planeamentu kona-ba orsamentasaun kada programa bazea ba Planu Estratéjiku Dezenvolvimentu (PED) 2011-2030 no Objetivu Dezenvolviemntu Sustentável (ODS) 2030, hanesan dokumentu estratéjiku no dokumentu polítiku.

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here