ABF iha Munisípiu Aileu ho inisiativa halibur ema ho defisiente no LGBTI kuda modo no ai-funan hodi fa’an. Imajen/Espesiál

DILI, 25 novembru 2021 (TATOLI)—Diretora Sentru Formasaun Hamutuk Ita Ajuda Malu (HIAM) Health, Rosaria Martins da Cruz, informa HIAM Health finaliza ona formasaun movel iha munisípiu Aileu.

Notísia Relevante: HIAM Health sei realiza formasaun movel iha Aileu

“Ami-nia formasaun movel ne’ebé hetan apoia hosi SEFOPE, ami finaliza ona iha fulan novembru nia laran iha semana kotuk ba partisipante hamutuk 40,” Rosaria Martins da Cruz hateten ba Agência Tatoli, via telefónika, kinta ne’e.

Maske formasaun finaliza ona maibé formandu sira sei hetan akompañamentu hosi formadór sira, tanba iha formasaun movel ne’e iha ninia prosesu hanesan hosi aproximasauun mai iha formasaun to’o akompañamentu.

“Agora ita tama iha faze akonpañamentu. Iha faze akonpañamentu ne’e fasilitadór sira sei akompaña, hanesan ba partisipante sira karik la aplika unidade kompeténsia sira-ne’ebé iha matadalan. Bainhira fasilitadór sira hanorin nia la halo tuir, signifika balun sei la pasa iha formasaun movel ne’e. Se nia la pasa, nia sei la tama ba iha faze graduasaun,” nia esplika.

Iha faze akonpañamentu ne’e kada partisipante hosi 40 ne’e, sira tenke hatudu duni sira-nia abilidade ba iha implementasaun unidade kompetensia ida-ne’ebé sira simu hosi sentru formasaun HIAM Health nia formadór sira tuir matadalan manorin nian.

“Ho nune’e, sira bele pasa iha faze ne’e hodi tama ba iha faze graduasaun,” nia dehan.

Entretantu, tuir nota imprensa ne’ebé Agencia Tatoli asesu ne’e haktuir, Diretora Rosária Martins da Cruz hamutuk ho Diretór Nasionál Formasaun Profisionál (DNFP), Mateus dos Santos W. Tallo, halo ona enseramentu ba formasaun movel ne’ebé hala’o iha sede suku Fahiria, Aisirimou no suku Saburia, ne’ebé lokaliza iha postu administrativu Aileu Villa, munisípiu Aileu ba partisipante hamutuk 40 (feto 16 no mane 24).

Iha enseramentu ne’e, Diretór Nasionál ba Formasaun Profisionál, Mateus dos Santos W. Tallo, hateten iha sekulu 21 ne’e hanesan sikulu ida-ne’ebé mak mobilidade eraborál ida-ne’ebé makaas tebes, hodi ezije tebes ema ida tenke iha abilidade.

Tanba ne’e, maka sai nu’udar polítika SEFOPE liuhosi DNFP hodi lori tun ba baze atu kria abilidade ne’ebé mak naton, atu nune’e joventude sira bele kompete iha merkadu.

“HIAM Health hanesan mós parseiru no nu’udar mós sentru formasaun ida-ne’ebé akreditadu hosi Institutu Nasionál Dezenvolvimentu Mão de Obra (INDMO) servisu hamutuk ho SEFOPE fasilita formasaun ba joven sira iha munisípiu Aileu,” Mateus dos Santos W. Tallo hateten.

Nia reforsa, SEFOPE mós kria ona programa ida hanaran autoempregu atu hakbi’it benefisiáriu sira atu bele mós aprezenta proposta ba SEFOPE hodi aumenta sira-nia kapitál ho objetivu mak atu hamenus dezempregu no bele kria mós oportunidade servisu ba ema seluk, nune’e hamenus númeru dezempregu ida-ne’ebé mak sai hanesan problema boot iha Timor-Leste.

Programa formasaun movel ne’e hanesan rezultadu ida hosi komitmentu servisu hamutuk ida ne’ebé mak asina tiha ona entre HIAM Health no SEFOPE liuhosi DNFP hanesan na’in ba implementadór ba programa refere, liuhosi kompeténsia ida-ne’ebé mak atribui hosi Governu sentrál ba Sekretaria Estadu Formasaun Profisionál Empregu (SEFOPE) Timor-Leste.

Entretantu, fundu ne’ebé Sekretaria Estadu Formasaun Profisionál Empregu (SEFOPE) fó apoia ba Sentru Formasaun Hamutuk Ita Ajuda Malu (HIAM) Health ne’e, hamutuk $23,390 hodi bele realiza formasaun movel iha área hortikultura.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here