DILI, 25 novembru 2021 (TATOLI)–Governu liuhosi reuniaun Konsellu Ministru (KM) deside ona hodi la propoin renovasaun Estadu emerjénsia (EE), ne’ebé sei termina iha loron 28 novembru, nune’e deside estabelese ekipa ida hodi halo akompañamentu ba situasaun ligadu ho prevensaun no mitigasaun COVID-19.
“Kona-ba ezisténsia Sala Situasaun, Sentru Integradu Jestaun Krize (CIGC, sigla portugés), Primeiru-Ministru fó ona instrusaun halo reajustamentu. Tanba iha ha’u-nia gabinete eziste gabinete jestaun krize, ne’ebé eziste ona desde situasaun krize, ne’ebé ikus mai transforma ba Sala Situasaun, entaun ami haree atu halo ajustamentu ba komposizaun ho mínimu ekipa hodi halo akompañamentu,” Primeiru-Ministru (PM), Taur Matan Ruak, hateten, hafoin reuniaun semanál ho Prezidente Repúblika, iha Palásiu Prezidensiál, Bairro Pite, kinta ne’e.
Notísia relevante: Governu deside la renova EE maibé aplika medida esesionál
Maski laiha EE maibé daudaun ne’e Governu prepara dekretu-lei hodi kontinua implementa kondisaun ne’e, ba loron 120 ka fulan-tolu.
“Ida-ne’e fó dalan ba ita restrinje ema-nia direitu, ezemplu ema sira mai hosi rai-li’ur tenke obrigatóriamente aprezenta kartaun vasina no rezultadu teste swab negativu, ne’ebé kuandu identifika infetadu maka tenke ba konfinamentu,” Xefe ezekutivu akresenta.
Nune’e, Governu kontinua husu ba populasaun ne’ebé seidauk vasina tenke hakbesik-an ba sentru vasinasaun hodi partisipa imunizasaun.
“Kampaña vasina la’o di’ak maski ladún másimu, tanba Governu nia alvu iha tinan ne’e nia rohan bele atinje 80% no daudaun ne’e doze dahuluk iha territóriu nasionál besik ona 80%, enkuantu doze daruak foin atinje 55,7%. Ne’e signifika ita tenke esforsu atu to’o tinan ne’e ramata bele etinje meta tanba karik konsege di’ak liu hodi tinan oin bele normaliza situasaun no fasilita ita ba rekuperasaun ekonomia,” nia tenik.
Entretantu, to’o kuarta (24/11) CIGC rejista kazu ativu rua, rekuperadu lima, ho totál kazu konfirmadu kumulativu 19.820 no óbitu 122.
Jornalista : Antónia Gusmão
Editora : Julia Chatarina
