SEFOPE realiza enkontru ho família traballadór timor-oan 21 no asina akordu molok arranka bá Korreia Súl, iha Senai Becora, kuarta (24/11). Imajen TATOLI/Francisco Sony

DILI, 24 november 2021 (TATOLI)—Traballadór timor-oan hamutuk 21 sei arranka bá Koreia Súl iha loron 26 novembru, tanba ne’e Sekretaria Estadu Formasaun Profisionál no Empregu (SEFOPE) ho parte família asina akordu.

“Ohin ita konvida família hosi traballadór 21 hodi partisipa iha seremónia asina akordu entre família ho Governu atu iha ligasaun metin, nune’e bainhira traballadór arranka, família tenke resposabiliza 50% no Governu 50%, atu aban bainrua bainhira mosu problema ruma karik ita hotu iha responsabilidade,” Diretór Nasionál Empregu Exterór, Filomeno Soares, hateten, iha Senai Becora, kuarta ne’e.

Diretór Nasionál Empregu Exteriór-SEFOPE, Filomeno Soares. Imajen TATOLI/Franciso Sony

Nune’e, Diretór ne’e husu ba traballadór sira kuidadu-an tanba ohin hahú teste Polymerase Chain Reaction (PCR) dala ida tan no aban sei tama kuarentena iha otél sira iha Dili laran, ne’ebé hanesan rekezitu hosi Governu Koreia Súl atu evita transmisaun COVID-19 bainhira tama iha rejiaun ne’e no bainhira to’o iha ne’ebá sei hasai tan teste médiku molok halo serbisu.

“Ohin hasai tan teste PCR, ne’ebé ita sei hein rezultadu, bainhira hetan rezultadu negativu maka bele halo viajen, enkuantu pozitivu sei kansela,” nia akresenta.

Notísia relevante: Traballadór timor-oan na’in-60 aranka ohin bá Koreia Súl

Traballadór 21 ne’ebé bainrua sei arranka kuaze mane hotu no sei serbisu iha área peska.

Iha biban hanesan, Reprezentante família traballadór, Salvadór Santos Gomes, agradese tanba nia-alin Noe dos Santos Lopes bele hetan oportunidade ba serbisu iha rai-li’ur.

“Situasaun família obriga alin tenke ba serbisu iha ema-nia rai, maibé tanba hakarak hadi’a ekonomia uma-laran tenke bá, nune’e bele sustenta família uma-laran, tanba ne’e ohin ami hamutuk ho SEFOPE atu iha resposabilidade ba traballadór sira molok halo viajen hosi Timor-Leste to’o destinasaun,” nia dehan.

Hanesan reprezentante família traballadór, nia husu ba traballadór sira bainhira to’o iha Koreia Súl,  hotu-hotu tenke kuidadu malu nune’e bele ajuda fali família iha Timor-Leste.

Tuir dadus SEFOPE, traballadór ne’ebé servisu iha Koreia Súl hahú hosi 2009 to’o novembru 2021 hamutuk 3.819, kompostu hosi mane 3.684 no feto 135.

Enkuantu ba tinan ida ne’e rasik SEFOPE haruka ona traballadór mane hamutuk 123.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here