Atividade ekipa Tránzitu iha estrada Viqueque villa, kuarta (24/11). Imajen TATOLI/Vitorino Lopes da Costa

VIQUEQUE, 24 novembru 2021 (TATOLI)—Polísia Nasionál Timor Leste (PNTL) Unidade Tránzitu munisípiu Viqueque durante hala’o atividade check point ba transporte públiku no privadu iha fulan-outubru, rekolla koima hosi infrasaun hamutuk $388.

“Atividade pasa revista ami halo kada semana, tanba ida-ne’e sai hanesan ami-nia devér hodi kontrola viatura iha munisípiu laran no asegura asidente,” Xefe Tranzitu munisípiu Viqueque, Sargentu Xefe Polísia, Venseslau Moreira de Oliveira Freitas, informa iha ninia knaar fatin, Quartel PNTL, Besken, Viqueque villa, kuarta ne’e.

Aleinde ne’e, rejista mós kazu asidente hamutuk neen iha fulan-outubru, kompostu hosi entre motorizada soke malu iha kazu haat no entre karreta soke malu iha kazu rua.

“Hosi kazu soke malu, mak ami relata balun ba Ministériu Públiku (MP), enkuantu kazu lima rezolve ona tuir família,” nia akresenta.

Tuir dadus, iha munisípiu Viqueque iha fulan-janeiru akontese infrasaun estrada hamutuk 27 ho koima $797, fevereiru infrasaun 31 koima $399, marsu infrasaun 33 koima $524, abríl infrasaun neen koima $180, maiu infrasaun 25 koima $386 no juñu infrasaun 14 koima $180.

Enkuantu, iha fulan-jullu, iha infrasaun kódigu estrada 23, ne’ebé akumula taxa $191, agostu infrasaun estrada 35 koima $325 no setembru akumula koima $ 238.00 no outubru akumula koima $388.

Nune’e, Xefe Tranzitu  ne’e husu, kondutór transporte públiku no privadu sira tenki kompleta dokumentu molok halo viaje, inklui motorizada sira tenki matein uza kapasete hodi proteje-an bainhira akontese asidente ruma.

Preende transporte tanba laiha lisensa

Durante halo atividade check point, PNTL Unidade Viqueque iha kuarta (24/11) preende transporte públiku ida tanba laiha karta lisensa, ne’ebé identifika katak parte suku maka halo karta deklarasaun hodi fó lisénsa ba kareta marka Carry 1300 tula pasajeiru hosi postu Uatulari mai Viqueque.

“Lisensa ne’e, la’ós xefe suku sira maka hasai hodi fó ba transporte sira, ne’ebé transporte sira ne’ebé laiha karta lisensa, hosi tránzitu ami husu di’ak liu lalika halo movimentu,” Xefe Tranzitu Sargentu Xefe Polísia, Venseslau Moreira, apela ba komunidade.

Ba kestaun ne’e, Diresaun Transporte Terreste mak iha kompeténsia hosi hasai lisensa ba sirkulasaun transporte públiku no privadu.

“Ami loron-loron halo check point ba transporte tula pasajeru, maibé uza xapa matríkula privadu, kuandu hetan hakarak ka lakoi tenke preende tanba kontra órden tranzitu. Nune’e, parte tránzitu sei implemeta tuir lei ba kareta Carry no sira sei hetan multa koima $60-resin. Kona-ba autorizasaun lisensa hosi Xefe suku, ami sei halo karta ba Diresaun Nasionál Transporte Terreste, nune’e ba futuru aktu sira ne’e la bele akontese tan,” nia akresenta.

Nune’e, Polísia Tránzitu preende hotu dokumentu no lori kerreta ba para iha Quartel PNTL Viqueque.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here