Enkontru via virtuál entre Primeiru-Ministru, Taur Matan Ruak, ho Vise-Prezidente Banku Mundiál foun ba Aziátiku no Pasífiku, Manuela V. Ferro, tersa (23/11). Imajen/GPM

DILI, 24 novembru 2021 (TATOLI)—Primeiru-Ministru (PM), Taur Matan Ruak, realiza reuniaun via virtuál ho Vise-Prezidente Banku Mundiál foun ba Aziátiku no Pasífiku, Manuela V. Ferro, hodi ko’alia kona-ba kompromisu entre parte rua ba prosesu dezenvolvimentu nasionál.

“Ami ko’alia kona-ba inseguransa ai-han, nutrisaun no planu rekuperasaun ekonómika pós COVID-19, inklui hanoin balun atu hamenus levantamentu ba Fundu Petróleu ne’ebé daudaun ne’e hanesan únika fonte ba Estadu Timor-Leste, ne’ebé sei subtitui ho polítika hasa’e empréstimu, atu nune’e bele garante sustentabilidade Fundu Petrolíferu ba tinan naruk,” Xefe Governu hateten liuhosi nota ne’ebé Agência TATOLI asesu kuarta ne’e.

Notísia relevante: Kapitál Fundu Petrolíferu to’o 30 setembru atinje biliaun $19,17

Aleinde ne’e, PM agradese ba parseiru ne’e no konvida Vise-Prezidente Banku Mundiál vizita Timor-Leste iha janeiru 2022, tanba sei iha planu organiza semináriu nível a’as ida kona-ba má nutrisaun iha Dili, ne’ebé presiza hetan apoiu hosi parseiru dezenvolvimentu sira.

Enkuantu, kona-ba polítika rekuperasaun ekonómika, Vise-Prezidente apresia ho polítika ne’e no apoiu inisiativa ne’e inklui hamenus levantamentu ba Fundu Petrolífera ho hasa’e fundu impréstimu.

“Banku Mundiál sei kontinua disponível atu apoiu Timor-Leste iha área hotu, liuliu iha inseguransa ai-han no nutrisaun, no hein katak Timor-Leste bele aproveita di’ak apoiu ne’e ba benefísiu povu Timor-Leste,” Manuela V. Ferro dehan.

Iha sorin seluk, Vise-Prezidente Banku Mundiál introdúz nia-an no ekipa iha Jakarta, Indonézia no Dili ba Xefe Governu atu kontinua diskusaun kona-ba kompromisu entre parte rua.

Nune’e, PM hato’o parabéns ba Vise-Prezidente, ba ninia kargu foun no revela polítika dezenvolvimentu nasionál.

Governu hahú asina akordu empréstimu ho Banku Mundiál, Banku Aziátiku Dezenvolvimentu (ADB, sigla Inglés) no Japan International Cooperation Agency (JICA) hamutuk ho montante millaun $457,51 iha tinan 2012 no to’o 2019.

 

Aleinde ne’e, empréstimu millaun $750 ne’ebé Governu iha tinan 2020 atu fasilita Governu halo negosiasaun ho banku sira, maibé la signifika katak empréstimu sira ne’e sei ezekuta hotu iha tinan ida nia laran.

Balansu atuál ne’ebé ezekuta ona iha tinan 2012 to’o 2019 hamutuk millaun $216,4.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here