Ofisiál PNTL no F-FDTL hala’o peskiza iha Viqueque. Imajen Tatoli/ Vitorino Lopes da Costa.

VIQUEQUE, 23 novenbru 2021 (TATOLI)- Ofisiál Polísia Nasionál Timor Leste (PNTL) no FALINTIL-Forsa Defeza Timor Leste (F-FDTL) halo peskiza iha munisípiu Viqueque hodi kompleta kursu Istitutu Defeza Nasionál (IDN).

“Ami mai ho estudante hosi instituisaun PNTL no F-DTL mesak komadante no diretór sira-ne’ebé durante ne’e tuir formasaun. Objetivu prinsipál hosi IDN atu ofisiál PNTL no F-FDTL bele hanoin kona-ba destinu nasaun Timor ba ne’ebé loos. Tanba ne’e ita presiza tuur hamutuk tanba destinu timór iha ita hotu nian liman,” Diretór Akademia IDN, Guilhlermino Soares ba jornalista sira, iha salaun PNTL munisípiu Viqueque, tersa ne’e.

Gulhermino hatutan, partisipa kursu Estadu Maiór Konjunta no Integradu (CEMCI, sigla portugés) besik tinan ida, no kursu Pos-Graduasaun Estudu Estratéjiku no Reziliénsia Nasionál (PGEERN, sigla portugués) durante fulan tolu, alunu sira-ne’ebé mai hosi ofisiál PNTL no F-FDTL.

Nune’e mós funsionáriu Superiór balun hosi Ministériu Negósiu Estranjeiru no Kopoerasaun (MNEK), Ministériu Interior (MI) Ministérou Defeza (MD) hamutuk na’in-18, sei tún ba terrenu halibur dadus iha munisípiu hodi kompleta sira-nia estudu iha IDN.

“Agora ita-nia alunu sira halo hela peskiza kona-ba asuntu ekonómia, sosiál, ambiente. Nune’e sira fila sei halo relatóriu. Vizita ida-ne’e, bele lori netik rezultadu no relatoriu sira-ne’e ami sei fó ba Primeitu Ministru (PM), Prezidente Repúblika (PR) no Parlamentu Nasionál (PN) kona-ba difikuldade sira-ne’ebé komunidade munisípiu Viqueque relata,” nia akresenta.

Tuir oráriu ne’ebé iha, hahú hosi loron 22 novembru to’o 22 dezembro Tinan ne’e, alunu sira sei, akompaña hosi IDN, hala’o viajen hosi kapitál Dili ba munisípiu Manufahi, Covalima, Bobonaro no RAEOA, ho objetivu halibur dadus.

“Alunu sira durante ne’e hetan ona matéria teoria barak, nune’e iha estudu prátika iha terrenu ne’e, alunu sira halibur dadus sira relevamte ho sira-nia matéria, hodi kompleta sira-nia teoria ne’ebe durante ne’e sira aprende, kontribui ajuda sira hakerek traballu individuál no grupu inklui hakerek monografia,” nia realsa.

IDN iha tinan ne’e kontinua realiza kursu rua ba alunu sira, hanesan kursu CEMCI ba faze daruak nian ho alunu na’in-13, komposta hosi Tenente Koronél na’in-rua no Majór na’in-lima hosi F-FDTL no Superintendente na’in-neen hosi ofisiál komandu PNTL. Maibe kursu refere la’o to’o dalan klaran, Tenente Koronél Domingos da Costa do Santos “Domin” hakotu nia jornada moris tanba sofre moras komplikadu no Majór na’in ida la kontinua tán ativu kursu refere tanba razaun saúde.

Ba kursu Pos-Graduasaun ba faze dalima, envolve mós ho alunus na’in-neen ne’ebe mai husi funsionáriu superiór sira hosi Ministériu Interior delega ofisiál polísia ho diviza superintendente asistente na’in-tolu, Ministériu Defeza nain ida no MNEK na’in-rua.

Nune’e matéria ba kursu CEMCI ne’ebé alunu sira aprende ona ba komponente formasaun tolu hanesan, komponente formasaun baze, komponente formasaun espesífika no komponente formasaun konjunta no estratéjia. Hakat ona ba Kursu Pos-gradusaun ho nia lema formasaun estratéjia ba futuru sustentável, hodi kontinua ho matéria metodolojia investigasaun sientífika ba estudu estratéjiku.

Iha fatin hanesan, Komandante PNTL Munisípiu Viqueque, Sebastião Alves Quintão, konsidera vizita ida ne’e komandu PNTL Viqueque bele relata difikuldade sira hanesan tranporte no kombustível hodi hato’o fali ba boot sira hodi responde preokupasaun PNTL nian.

“Ami bele relata preokupasaun sira hanesan transporte no kombustível ba ofisiál polísia suku (OPS) ne’ebé durante hala’o servisu iha suku, maibé sira laiha mina motorizada,” Sebastião subliña.

Jornalista         :Vitorino Lopes da Costa
Editór               : Evaristo Martins

PUBLISIDADEiklan

HAKEREK NO HATÁN

Please enter your comment!
Please enter your name here