Covalima selebra loron mundiál ai-han ho semináriu. Imajen Tatoli/Celestina Teles.

COVALIMA, 24 novembru 2021 (TATOLI)—Servisu Munisípiu Seguransa Alimentar (SMSA) Covalima, selebra loron mundiál ai-han ho tema “Harii Sistema Aí-Han mais Reziliente atu Hetan Timor-Leste ne’ebé Nutritivu, Saudável no Seguru”.

Diretór Nasionál Seguransa Ai-Han, Rofino S. Gusmão hateten, loron mundial aí han hanesan loron importante ne’ebé kada tinan Governu liuhosi KONSSANTIL munisípiu Covalima selebra, atu valoriza ema hotu nia esforsu no asegura ema-nia direitu fundamentál ba asesu ai-han seguru.

“Objetivu atu haforsa sistema ai-han liuhosi hadi’a produsaun, nutrisaun, ambiente no moris di’ak ba populasaun Timor-Leste nian. Kada tinan Timor-Leste mós selebra loron mundial ai-han tanba atu fó hanoin ba ita katak asuntu ai-han importante iha ita-nia rain. Selebrasaun ne’e la’ós realiza iha nasionál de’it maibé selebra mos iha munisípiu sira hosi postu administrativu sira to’o suku,” Rofino S. Gusmão hateten liuhosi nia diskursu, iha Salaun Uma Feto, Santa Rosa, Covalima, kuarta ne’e. 

Tanba, nia dehan, asuntu seguransa ai-han no in-seguransa ai-han mak indika númeru má nutrisaun barak liu akontese iha suku no aldeia sira iha área remota iha territóriu nasionál.  

Razaun kazu má nutrisaun aumenta makaas liu iha fatin ne’ebè mak la asesu informasaun la’ós laiha produsaun ai-han. 

“Ita iha produsaun kuaze Timor laran tomak sai produtór ka servisu iha setór agrikultura. Bainhira nia prodús, nia bele han no balun halo produsaun atu faan de’it hafoin lori osan sosa fali produtu importasaun,” nia hateten.

Ko’alia kona-ba seguransa alimentar la kestiona kona-ba kulidade hahan, maibe ko’alia kona-ba nutrisaun atu halo mundansa ba seguransa ai-han, nune’e bele halo mudansa situasuan seguransa ai-han no má nutrisaun iha Timor-Leste.

Bazea ba dadus númeru má nutrisaun boot tebes to’o ainje ona 46%, mak selebrasaun loron mundiál ne’e realiza ho atividade ne’ebè ema ida-idak halo no bele implementa iha iha ida-idak uma.  

Adjuntu Sekretáriu Administradór Munisípiu Covalima, Francisco de Jesus Alves, hateten selebra loron mundiál ai-han monu iha loron 16 fulan outrubru ne’e, maibé foin mak selebra iha Covalima tanba situasaun pandemia COVID-19. 

 “Ohin ita ko’alia kona-ba seguransa ai-han. Ita ko’alia kona-ba ai-han tenke servisu makaas hosi ita-nia agrikultór sira-ne’ebè prodús ai-han, ita han loro-loron,” nia dehan. 

Loron ida ohin ne’e, orgullu no apoia makaas ba agrikultura liu-liu ba agrikultór sira kontinua servisu makaas hodi hasa’e produsaun iha Timor-Leste espesiál iha munisípiu Covalima.

Maske Agrikultór sira hasoru dezafiu hodi enfrenta dezastre naturál hanesan anin, bee-mota no seluk tán hodi estraga ai-han iha to’os hodi responde ba nesesidade merkadu iha Timor-Leste, maibé Timor-Leste nia agrikultura sei hala’o ho sub-sistema seidauk tama iha komérsiu sira prodús ai-han atu han de’it.

Iha selebrasaun ne’e partisipa másimu hosi diretór munisípiu sira, líder komunitária, extensionista hosi Postu Aminisratuvu hitu (7) no estudante sira.

Jornalsita : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here