Atividade hatun sasán importasaun hosi ró iha Portu Dili, segunda (11/10). Imajen TATOLI/António Gonçalves

DILI, 24 novembru 2021 (TATOLI)–Diretór Nasionál Regulasaun Komersiál no Protesaun Konsumidór hosi Ministériu Turizmu, Komérsiu no Indústria (MTKI), Bertinetti Vieira Lobo Baptista, hateten, folin sasán iha merkadu nasionál iha fulan-rua ikus sa’e tanba limitasaun transporte marítima.

“Preokupasaun sira ne’ebé ami simu katak folin sasán iha merkadu hanesan nesesidade bázika, materiál konstrusaun no kombustível sa’e tanba transporte ró boot sira ne’ebé lori sasán hosi rai-li’ur tama portu ne’e limite tebes, ita hatene 80% ita depedente ba sasán importasaun,” Diretór dehan ba Agência TATOLI, iha ninia knaar fatin, Bebora, kuarta ne’e.

Antes ne’e, MTKI konvoka enkontru ho ajénsia distributór nesesidade bázika, materiál konstrusaun inklui kombustível, inklui traballadór servisu portuáriu no seluk tan hamutuk 33, hodi rona preokupasaun no tau hanoin hamutuk hodi hadi’a kondisaun.

Bertinetti Vieira haktuir, durante enkontru, emprezáriu sira husu Governu atu normaliza atividade portuáriu, nune’e movimentasaun ró bele livre lori sasán importasaun, tanba folin sasán depende ba sasán tama.

“Husu Governu tenke halo diplomasia ho parte Ministériu Negósiu Estranjeiru no Kooperasaun (MNEK) no Ministériu Interiór (MI) atubele toma asuntu ne’e,” nia akresenta.

Situasaun antes ne’e bainhira seidauk aplika kondisaun iha rai-laran hodi mitiga COVID-19, ró lori sasán importasaun fulan-ida tama portu dala-haat, maibé hafoin aplika serka sanitária no konfinamentu obrigatóriu domisiliáriu, fó limitasaun ró transporta sasán mai fulan-ida dala-ida.

Atu rezolve kondisaun folin sasán sa’e iha merkadu, tuir polítika MTKI liuhosi Diresaun Jerál Komérsiu no Diresaun Nasionál Regulasaun Komersiál, konkorda antispadamente hahú ba oin loke portu, nune’e movimentu ró bele normál lori sasán tama rai-laran.

Ba kestaun ne’e sei komunika ho Ministru Turizmu, Komérsiu no Indústria hodi bele lori kestaun ne’e ba Konsellu Ministru hodi diskutu hodi hetan desizaun.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here