Becune FC halakon FC São João Batista 4-0 iha 8 finál Kopa AFO. Imajen Tatoli/Abílio Elo Nini.

OÉ-CUSSE, 24 novembru 2021 (TATOLI) – Ekipa jogadór hosi FC Becune halakon FC São João Batista iha 8 finál Kopa Assosiasaun Futeból Oé-Cusse (AFO) sub-22 ho rezultadu 4-0.

Jogu 8 finál ne’e realiza iha kampu futeból Oébau, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA) iha kuarta ne’e, nune’e ekipa jogadór FC Becune hakat ba 4 finál hodi hasoru ekipa jogadór FC Binipu sei joga iha loron sesta 26 novembru ne’e.

Jogu iha primeira parte ho durasaun menutu 45, ekipa jogadór FC Becune domina liu bola tanba ekipa jogadór sira unidade no sólidu, tanba jogu foin hahú iha menutu 6, jogadór António Elu númeru kamizola 11 lansa ona golu, nune’e jogu termina primeira parte FC Becune lidera provizóriu ho rezultadu 1-0.

Purtantu hakat fali ba jogu segunda parte ho durasaun menutu 45, ekipa jogadór hosi São João Baptista hahú hatudu estratéjia hodi troka jogadór sira inklui guarda-rede, maibé estratéjia ne’e la konsege prodús golu ruma

Nune’e jogu kontinua la’o to’o menutu 65 ekipa FC Becune lansa golu daruak hosi jogadór António Elo númeru kamizola 11 hodi muda rezultadu ba 2-0.

Ho rezultadu ne’e lori sorti di’ak ba ekipa FC Becune, tanba jogu foin to’o menutu 66 de’it jogadór Rogério de Sousa númeru kamizola 12 lansa-tán golu ba datoluk nian, hodi muda rezultadu ba 3-0.’

Purtantu jogu kontinua la’o, to’’ekipa FC Becune kontinua hatudu jogu tuir téknika no abilidade ekipa ne’e nian, nune’e to’o fali menutu 87 jogadór António Elo lansa-tán golu, nune’e jogu sgunda parte termina ho menutu 90, ekipa FC Becune lidera iha 8 finál ho rezultadu 4-0.

Tanba ne’e, treinadór FC São João Batista, Juvito Neno sente triste tanba ekipa jogadór sira jogu la hatudu unidade iha kampu laran, nune’e fó oportunidade ba ekipa FC Becune lansa golu.

“Jogu mak hanesan ne’e, jogu iha lakon no iha manán, ami lakon tanba jogadór sira ladún unidu no ladún domina kampu, tán ne’e mak ami lakon,” nia katak.

Treinadór FC Becune, Domiziliano Koi, agradese ba ekipa jogadór sira tanba hetan rezultadu hodi hakatak ba 4 finál.

“Ha’u hanesan treinadór agradese ba jogadór sira tanba ohin lokraik jogadór sira hatudu jogu di’ak, ida-ne’e ami sei hadi’a di’ak liután nune’e jogu iha 4 finál ami bele hatudu jogu di’ak,” nia orgullu.

Entretantu, jogu ho durasaun menutu 90 ne’e lidera hosi árbitru Armandino da Costa Cusi no asistente árbitru Maria Coel, asistente dahuluk Octaviano da Cruz no asistente daruak Francisco Cofi.

Jogu Kopa Assosiasaun Futeból Oé-Cusse (AFO) iha faze 8 finál termina iha loron kuarta 24 novembru ne’e, nune’e iha loron kinta 25 to’o sesta 26 novembru kontinua fali ba jogu faze 4 finál.

Klubu ne’ebé serbisu maka’as hodi ultrapasa ba 4 finál iha Kopa AFO sub-22 tinan ne’e maka hanesan, FC Sarankeu, FC Amor Oébau, FC Becune no FC Binipu.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here