Produtu lokál ne’ebé venededór sira fa’an hodi selebra loron Proklamasaun Independénsia 28 Novembru iha Darsula. Imajen Tatoli/Natalino Belo.

BAUCAU, 24 novembru 2022 (TATOLI) – Komemorasaun loron Proklamasaun Independénsia 28 Novembru ba dala-46 nível nasionál nian ba tinan 2021 selebra iha aldeia Darsula, suku Gariuai, postu administrativu Baucau Vila, munisípiu Baucau nune’e oras ne’e negosiante lokál harame Darsula.

Nercio Cirilio Gusmão no Cristiano Alves Ximenes nu’udar estudante sestu siklu hosi Ensinu Báziku Darsula (EBF) Filiál Aubaka, ho idade 13, sente kontente ho desizaun Governu komemora loron istóriku ne’e  iha aldeia Darsula, tanba fó rendimentu di’ak ba komunidade lokál. 

Nercio Cirilio Gusmão no Cristiano Alves Ximene nu’udar estudante hosi Ensinu Báziku Darsula (EBF) Filiál Aubaka, ho idade 13, fa’an sigarru iha Darsula. Imajen Tatoli/Natalino Belo.

“Ema barak halibur ami iha-ne’e, ami-nia sigarru folin mesmu antes ne’e fa’an ona, maibé iha tempu ida-ne’e folin di’ak loos,” Cirilio hateten iha fatin serimónia Darsula.

Estudante na’in-rua ne’e fa’an sasán apoia inan-aman nune’e bele sustenta nesesidade bázika iha uma-laran.

Cirilio konfesa, negósiu provizóriu iha Darsula ne’e loron ida hetan lukru totál $10 to’o $20 hosi sigarru slop ida. Sigaru masu ida variante hosi lulun 2, 3 sentavu 0,25, haat ba neen sentavu 50, masu ida hosi $1,50 to’o $2.

“Loron ida fa’an slop ida no hetan $5 to’o $10,” Cristiano akresenta.

Nune’e mos Martinho Gusmão nu’udar juventude, hanesan negosiante nú-laloir sente kontente ho desizaun governu selebra loron 28 Novembru iha rai Darsula tanba konsidera fó rendimentu natoon ba komunidade lokál. 

“Fó benefísiu, ha’u foin fa’an maibé gerobak tolu ona, ohin loron ha’u hetan osan $20 ho nú-fuan 20,” Martinho akresenta.

Nune’e mós Joana Maria da Costa, nu’udar komunidade hosi suku Bucoli ne’ebé mak harii kioske provizóriu atu fa’an produtu lokál no importadu hanesan: hudi, ai-nanas, ákua, pop mie sente kontente tanba bele hasa’e rendimentu ekonomia. 

Negosiante Joana hosi suku Bucoli ne’ebé mak harii kioske provizóriu atu fa’an produtu lokál iha Darsula. Imajen Tatoli/Natalino Belo.

“Ami lori produtu lokál mai fa’an iha-ne’e hodi buka netik moris, ho loron boot fó benefísiu ekonomia, loron ida ami hetan netik orsamentu $40,” Joana hateten.

Tuir observasaun Agência TATOLI iha fatin serimónia kuaze komunidade lokál harii kioske provizóriu tanba hakarak aproveita situasaun rame relasiona ho selebrasaun 28 Novembru.

Kioske sira refere harii iha dalan-ninin ne’ebé negosiante sira fa’an katupa, dosi, ai-fuan lokál hanesan haas, hudi, ai-nanas, nú-laloir, sigarru, áqua, pop mie no seluk tan.

Aldeia Darsula parte hosi suku Gariuai, postu administrativu Baucau Vila, maioria komunidade moris vida agrikultór ho totál populasaun tuir dadus sensus 2015 hamutuk 338. 

Negosiante sira hahú fa’an sasán iha Darsula. Imajen Tatoli/Natalino Belo.

Aldeia Darsula geografiamente viziñu ho suku Triloka, postu administrativu Baucau Vila no Ostiku, postu Vemasse ne’ebé komunidade maioria utiliza lian materna rua hanesan Makasae no Uaimaa.

PNTL Baucau presiza asegura seguransa

Iha loron kuarta ne’e, Vise-Ministru Interior, António Armindo, vizita iha komandu PNTL Baucau atu observa preparasaun membru PNTL nian relasiona ho seguransa iha serimónia nasionál Proklamasaun Independénsia ba dala-46 ne’e.

“Ita-nia membru PNTL ne’ebé destaka iha Baucau atu halo serbisu másimu, nune’e selebrasaun 28 Novembru la’o ho susesu,” Vise-Ministru Interior ko’alia iha Vila Nova.

Liuhosi vizita refere, António Armindo hato’o parabéns ba PNTL Baucau tanba bele atua situasaun seguransa mesmu antes ne’e iha fulan-novembru mosu konfrontu entre juven iha rejionál ne’e.

Jornalista         : Natalino Belo

Editór                : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here