Komandante Seksaun Investigasaun Kriminál PNTL Munisípiu Bobonaro, Asistente Inspetór Alexandro Rego Mota

BOBONARO, 24 novembru 2021 (TATOLI) – Polisía Nasional Timor-Leste (PNTL) komandu munisípiu Bobonaro kontinua detein suspeitu  na’in-rua ho inisiál ZP (16) no JP (18) ne’ebé na’ok motorizada tanba sei hein na’in ba motorizada presta deklarasaun ba komandu munisípiu refere.

Komandante Seksaun Investigasaun Kriminál PNTL Munisípiu Bobonaro, Asistente Inspetór Alexandro Rego Mota, informa bazea ba rezultadu identifikasaun supeitu na’in-rua ne’e orijen hosi munisípiu Dili, maibé hela fatin la hanesan, suspeitu ho insiál ZP (16) hosi Bairru-Píte no JP (18) hosi Caicoli.

“Prosesu idetifikasaun ba sira na’in-rua remata ona, agora ita hein hela motorizada na’in tanba ohin ita halo konfirmasaun ona ninia paradeiru sei iha hela Dili. Sé nia to’o mai mak ita halo identifikasaun ba nia depois remata mak haruka prosesu ba Ministériu Públiku,” nia ko’alia iha Maliana, kuarta ne’e.

 Kronolojia

Suspeitu na’in-rua lori motorizada ho marka mio beat,  kór-azúl ne’ebé kahur metan laiha xapa-matríkula mai hosi Dili tama iha área Mamaruma, suku Lahomea, postu administrativu Maliana, fa’an ba sidadaun Lahomea ho inisiál DMF.

Maibé tanba sidadaun refere haree suspeitu na’in-rua oin foun, entaun halo investigasaun no husu razaun fa’an motorizada ne’e, entaun suspeitu na’in-rua ta’uk no halai lakon husik hela motorizada.

Iha momentu ne’e, DMF mós orienta kedas joven sira buka-tuir kaptura hafoin komunidade sira informa ba iha Polísia Task Force Bobonaro ba foti iha loron segunda hodi loriba komandu halo identifikasaun ba supeitu na’in-rua.

Nune’e Polísia Seksaun Investigasaun Kriminál hahú halo identifikasaun ba suspeitu na’in-rua ne’e, maibé suspeitu na’in-rua la fó deklarasaun kompletu kona-ba objetivu hosi Dili mai Maliana.

Ho nune’e parte komandu PNTL Bobonaro komunika ba nasionál no nasionál fó resposta katak suspeitu na’in-rua ne’e nia objetivu hosi Dili ba fa’an motorizada iha Maliana.

Ho baze ba ida-ne’e mak supeitu na’in-rua foin deklara katak na’ok duni motoriazada atu fa’an ba komunidade sira iha Maliana. Enkuantu daudaun ne’e, polísia asegura hela suspeitu na’in-rua iha komandu munisípiu inklui motorizada hodi hodi hein prosesu kontinuasaun.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here