Ekipa jogadór Sarankeu FC, halakon FC São Fransisco iha 8 final. Imajen Tatoli/Abílio Elo Nini.

OÉ-CUSSE, 23 novembru 2021 (TATOLI) – Ekipa jogadór hosi FC Sarankeu halakon ekipa jogadór FC São Francisco Oémolo iha 8 finál Kopa Assosiasaun Futeból Oé-Cusse (AFO) ba sub-22 ho rezultadu 3-2.

Jogu 8 finál ne’e realiza iha kampu futeból Oébau, sub-rejiaun Pante Makassar, Rejiaun Administrativa Espesiál Oé-Cusse Ambeno (RAEOA) iha tersa ne’e, nune’e ekipa jogadór FC Sarankeu hakat ba 4 finál sei hasoru ekipa jogadór FC Amor Oébau iha semana oin.

Jogu primeira parte ho durasaun menutu 45, ekipa rua ne’e lansa kedas kontra no atake tuir téknika no abilidade ekipa idak-idak nian ne’ebé orienta hosi treinadór sira, tanba iha jogu iha primeira parte ekipa rua hatudu forsa hanesan hodi produs rezultadu 2-2.

Jogu iha primeira parte ekipa jogadór FC Sarankeu lansa dahuluk golu hosi jogadór Mayolus Oqui númeru kamizola 12 liuhosi suta penalidade, nune’e mós ekipa FC São Francisco Oémolo kontinua kedan lansa golu iha menutu 34 liuhosi jogadór Calisto Balok númeru kamizola 6, nune’e ekipa rua hatuur rezultadu 1-1.

Jogu kontinua la’o to’o de’it menutu 37, FC São Francisco lansa-tán golu ida liuhosi jogadór Agustinho dos Santos Sole númeru kamizola 17 hodi muda rezultadu ba 2-1, nune’e ekipa Fc Sarankeu hahú esforsu to’o fali menutu 39 jogadór Joseferino Anin númeru kamizola 7 lansa golu, nune’e jogu primeira parte to’o termina ekipa rua hatuur rezultadu ba 2-2.

Purtantu hakat fali ba jogu segunda parte ho durasaun menutu 45, lori sorti di’ak ba ekipa FC Sarankeu tanba jogu foin to’o de’it menutu 63 jogadór Mayolus Oqui lansa kedan golu nune’e jogu termina iha menutu 90 ekipa rua ne’e hatuur rezultadu 3-2.

Ho rezultadu ne’e treinadór FC São Francisco, Marcelino Nono, rekoñese lakon tanba falta tátika no domina kampu nune’e fó oportubidade ba ekipa FC Sarankeu hodi hakat ba 4 finál.

“Ami lakon iha tátika pasa bola mak seidauk, depois jogadór sira ladún domina kampu, tanba ne’e maka hodi ami lakon iha 8 finál ne’e,” nia katak

Treinadór FC Sarankeu, Sebastião Oqui, agradese ba ekipa jogadór sira tanba konsege ultrapasa 8 finál ne’e hosi hakat ba 4 finál.

“Ami preparadu atu kompete ho jodu di’ak iha 4 finál, ohin ne’e ami manán tanba jogadór unidu no serbisu hamutuk mak ami hetan rezultadu ne’e,” nia orgullu.

Entretantu, jogu ho durasaun menutu 90 ne’e, lidera hosi árbitru Armandino dos Santos Cusi, asistente dahuluk Gerson Pereira, asistente daruak Octaviano da Cruz.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here