Diretòr Nasionàl seguransa alimentar hamutuk Komandante PNTL Covalima vizita grupu kulinária sira halo prosesamentu ai-han produtu lokál. Imajen Tatoli/Celestina Teles.

COVALIMA, 24 novembru 2021 (TATOLI)—Grupu Centro Vokasionál Treinamentu Canosiana (CVTC), sai primeiru lugar iha kompetisaun kulinária prosesamentu ai-han lokál, ne’ebé realiza hosi Servisu Munisípiu Seguransa Alimentár no KONSANTIL hodi komemora loron mundial ai-han iha Covalima. 

Adjuntu Sekretáriu Administradór Munisípiu Covalima, Francisco de Jesus Alves, hato’o parabéns ba grupu sira-ne’ebè mak sai vensedór iha ba grupu refere ne’ebé iha kreatividade hodi diversifika ai-han lokál.  

“Ha’u hato’o parabéns ba grupu primeiru lugar no grupu sira seluk, ne’ebé badinas no iha kreatividade hodi diversifika ai-han lokál ne’ebè mak iha,” Francisco de Jesus Alves hato’o mensajen molok entrega prémiu ba grupu vensedór sira iha salaun Uma Feto, Santa Rosa, Covalima, kuarta ne’e. 

Francisco mós husu ba administradór no líder komunitária sira atu fó korajen nafatin ba grupu sira hanesan grupu agrikultura iha suku sira hodi hamosu ideia inovativu, au halo prosesamentu ai-han lokál. 

“Hha’u repete hahan importante tebes ba ita-nia moris loro-loron ni’an. Se ita la han buat ida, ita-nia moris ne’e la furak hotu,” nia hateten. 

Xefe Grupo Canossa Vokasionál Training Center Covalima, Blasius Barreto, sente kontente anba sai vensedór dahuluk iha kompetisaun kulinária prosesamentu ai-han lokál ne’e. 

“Ami kontente sai vensedór iha komopetisaun kulinária ida-ne’e, maibe ami mos triste bainhara hetan kritika hosi grupu sira la rekuñese ami-nia grupu ne’e,” nia haktuir. 

Grupo CVTC sai vensedór tanba halo prosementu ai-han lokál hanesan soupa batar nurak, na’an bibi tunu no tukir, etu ne’ebé ein hosi hare metan no mutin no budu tomate ho pipiñu. 

“Se iha tán kompetisaun kulinária seluk, ami sei la aprezenta menu ne’ebè mak ami aprezenta ona, ami sei aprezenta menu seluk,” nia informa. 

Iha kompetisaun kulinária ne’e, grupu CVTC sai vensedór dahuluk ne’ebè hetan premiu ho osan $450.00, grupu Remajileju sai vensedór daruak ne’ebè hetan prémiu osan ho montante $400.00, grupu Nutrisaun sai vensedór ba datoluk ne’ebé hetan prémiu orsamentu $350.00 no grupu Halal hetan prémiu ho orsamentu $300.00, grupu Haburas Goronto hetan prémiu osan $250.00, grupu Haburas Tuna Maus hetan prémiu $200 no grupu Haburas Nutrisaun hetan prémiu $100.

Jornalista : Celestina Teles

Editór      : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here