Ministru Prezidente Konsellu Ministru, Fidelis Manuel Leite Magalhães. Imajen TATOLI/Francisco Sony

DILI, 24 novembru 2021 (TATOLI)—Ministru Turizmu, Komérsiu no Indústria, José Lucas do Carmo da Silva, aprezenta Projetu Dekretu-Lei iha reuniaun Konsellu Ministru (KM), kona-ba kria liña kréditu ho naran fasilidade garantia kréditu suave.

Dekretu-lei ne’e ho objetivu atu promove no estimula emprendedorizmu sosiál no aposta iha projetu inovadór sira hodi permite fortalesimentu emprezariál no industriál nasionál,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu, iha Palásiu Governu, kuarta ne’e.

Nune’e, sei kapitaliza no fasilita asesu finansiamentu ba empreza mikro, kiik no média sira, liuliu ba emprendedorizmu sosiál no inovasaun iha setór komérsiu, turizmu no indústria.

Antes ne’e, Ministériu Turizmu Komérsiu no Indústria (MTKI) hamutuk ho Banku Nasionál Komérsiu Timor-Leste (BNCTL, sigla portugés) realiza workshop atu sosializa kréditu suave ho funan 3% ba kada tinan ho períodu durante fulan-tolu to’o neen ba mikro, pekena no média empreza.

Notísia relevante: Rekezitu asesu kréditu suave tenke iha negósiu no lisensa SERVE

Rekezitu ne’ebé banku aplika tenke iha negósiu no lisensa hosi Servisu Rejistu Verifikasaun Emprezariál (SERVE) no empreza ne’ebé halo negósiu tenke iha área produtivu hanesan agrikultura, turizmu, pekuária, peska, indústria no komérsiu hodi kria kampu traballu iha rai-laran.

Ba inisiativa ne’e, komisaun responsável hanesan MTKI, BNCTL, Kámara Komérsiu Indústria, Timor-Leste (CCI-TL) no Institutu Apoiu Dezenvolvimentu Emprezariál (IADE) mak sei halo avaliasaun no verifikasaun proposta asesu fasilidade ne’e.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here