Diretora Jerál Ensinu Superiór no Siénsia, Maria Filomena Lay Guterres. Imajen TATOLI/Francisco Sony

DILI, 24 novembru (TATOLI)–Estudante na’in-18 hosi Instituisaun Ensinu Superiór públiku no privadu ualu partisipa iha diskursu públiku hodi komemora Loron Nasionál Ensinu Superiór no Loron Internasionál Siénsia.

Diretora Jerál Ensinu Superiór no Siénsia hosi Ministériu Ensinu Superiór Siénsia no Kultura (MESSK), Maria Filomena Lay Guterres, deklara, komemorasaun loron iha nível edukasaun ne’e sei realiza eventu rua hanesan diskursu públiku no eskrita kreativa iha loron 27 novembru.

“Objetivu prinsipál ba komemorasaun loron importante rua ne’e, atu promove no oferese oportunidade halo reflesaun hodi estudante ensinu superiór sira halo debate atu hatudu kapasidade no abilidade aprezenta diskursu ho lian portugés,” Diretora Jerál ne’e hateten iha ninia knaar fatin, Villa verde, kuarta ne’e.

Tuir Maria Filomena, diskursu públiku atu promove líder joven atuál atubele iha koñesimentu lian ofisiál portugés no no promove kreatividade hanoin krítiku.

Tanba ne’e, Governu liuhosi MESSK bolu atensaun ba estudante ensinu superiór atu reflete kona-ba dezafiu no oportunidade ensinu superiór iha Timor-Leste, liuliu hasoru dezafiu COVID-19 hodi haree liu ba saúde.

“Realidade hatudu joven barak mak hatene ko’alia portugés, maibé sira laiha oportunidade atu hamriik iha fatin públiku,” nia akresenta.

Iha sorin seluk, Reprezentante Institutu São João de Brito, Inácio Edu Fátima Martins, ne’ebe sei partisipa iha eventu diskursu públiku haksolok tanba bele konkorre iha eventu importante ne’e no nia parte halo ona preparasaun durante semana rua.

“Ha’u garante sei sai estudante ne’ebé hetan valór di’ak iha eventu diskursu públiku tanba ha’u-nia preparasaun másimu tebes,” nia dehan.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here