Dom Virgílio do Carmo hatuur fatuk dahuluk ba kontrusaun Igreja Parókia Sagrada Coração de Jesus Oésilo. Imajen Tatoli/Abílio Elo Nini.

OÉ-CUSSE, 24 novembru 2021 (TATOLI) – Arsebispu Arkidioseze Metropolitana Dili, Dom Virgílio do Carmo da Silva, kuarta ne’e hatuur fatuk dahuluk ba konstrusaun foun Parókia Sagrada Coração de Jesus Oésilo, iha suku Bobometo, sub-rejiaun Oésilo.

Arsebispu Arkidioseze Metropolitana Dili ne’e esplika, objetivu harii Kreda foun tanba natureza la permite nune’e sai preokupasaun ba sarani Oésilo, maibé fiar ba Maromak sei la nakdoko, tanba fiar metin ne’e maka sarani sira hakarak hetan fatin di’ak hodi selebra Nai Maromak nia domin dame ba sarani hotu.

Dom Virgílio ne’e fó-sai katak, konstrusaun iha Oésilo ne’e responsabilidade dioseze nian, maibé iha tinan ne’e, dioseze asume Igreja boot lubuk ida tanba lansa ona iha Hatulia, Aileu no semana ne’e hatuur fatuk dahuluk iha Fatuberliu.

“Tanba Igreja barak kondisaun obriga ita atu halo foun, maibé sarani Oésilo hamutuk ho konsellu parókia iha inisiativa di’ak, hakarak tinan ne’e hahú ona, entaun dioseze mak responsabiliiza tomak ba inisiátiva ne’e,” Arsebispu Arkidioseze Metropolitana Díli, Dom Virgílio do Carmo da Silva, ko’alia iha iha serimónia ne’e.

Dom Virgílio husu sarani sira labele hanoin fatin ne’e atu remata iha tempu badak, maibé importante liu mak prosesu harii Igreja ne’e nu’udar oportunidade ba sarani Oésilo tomak bele fó liman ba malu, kria amizade iha sosiedade serbisu hamutuk di’akliu tán.

Konsellu Pastorál Parókia Oésilo, Bento Bobo, informa, kontribuisaun hosi sarani sira ba konstrusaun ne’e mai hosi suku Bobometo, Usitasae no Usitaqueno, moris ho estasaun tolu: estasaun Oélmanbai, Tumin no estasaun Oébaha, ne’ebé envolve kapela 10, ho totál sarani sira iha suku tolu ne’e hamutuk uma-kain 2.730, ho totál populasaun hamutuk rihun 14.

“Ami-nia parókia moris ho família kiik no kiak, maibé tanba kondisaun parókia, ne’ebé hatodan no ejize ami atu halo, tan ne’e lori sarani Oésilo nia naran hato’o ami-nia preokupasaun ba nai-lulik no nai-ulun sira, karik bele tau matan netik ba ami-nia halerik,” nia sujere.

Katekista Pastorál Parókia Oésilo, Francisco Ais, hateten, razaun prinsipál konstrui igreja ne’e mai mós hosi kontribuisaun sarani nian.

“Kada uma-kain sei kontribui dolar $5, ba funsionáriu dolar $10, ne’e maka razaun prinsipál ami konstrui Igreja parókia ne’e, tanba Igreja ne’e tinan 32 ona, entaun presiza harii foun,” nia katak.

Entretantu, Reprezentante Prezidente Autoridade RAEOA atuál Sekretária Rejionál ba Asuntu Edukasaun Solidariedade Sosiál no Inkluzaun, Avelina da Costa, prontu apoia sarani sira-nia inisiativa nune’e obra bele la’o ba oin.

“Ami admira ho inisiativa sarani Oésilo nian, tan ne’e bainhira ita halo buat ruma presiza kolaborasaun serbisu hamutuk, autoridade sei la nonok, ami sei hato’o inisiativa ne’e ba Prezidente Autoridade, nune’e oinsá bele konsidera sarani sira-nia inisiátiva ne’e,” nia subliña.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here