Diretór Sentru Solidariedade Sosiál no Inkluzaun munisípiu Viqueque, Geraldo de Carvalho. Imajen TATOLI/Vitorino Lopes da Costa

VIQUEQUE, 24 novembru 2021 (TATOLI)-Diretór Sentru Solidariedade Sosiál no Inkluzaun munisípiu Viqueque, Geraldo de Carvalho, informa, Banku Nasionál Komersiál Timor Leste (BNCT, sigla portugés) sukursál Viqueque halo ona pagamentu ba idozu no invalidez hamutuk 8.385.

“Servisu MSSI hamutuk ho banku hahú pagamentu idozu iha postu Viqueque villa faze daruak, ba benifísiariu idozu hamutuk 7.657 no invalidez hamutuk 728,” Diretór Sentru Solidariedade Sosiál no Inkluzaun munisípiu Viqueque, Geraldo de Carvalho, informa ba Agência TATOLI, iha ninia knaar fatin, Viqueque villa, kuarta ne’e.

Tuir Diretór ne’e, iha mudansa oituan ba sistema pagamentu, ne’ebé uluk pagamentu iha postu no sentru de’it, maibé daudaun ne’e BNCTL halo pagamentu direta iha kada suku.

“Ita-nia Autoridade suku no Ofisial Polísia suku maka halo kontrolu. Sistema pagamentu ba suku ne’e ho intensaun atu hakbesik-an liu ba benifísiariu sira,” nia akresenta.

Tuir dadus, idozu hosi postu Lacluta 903 no invalidez 81, postu Ossu 1.783 no invalidez 77, postu Uatulari hamutuk 2.245 no invalidez 269, postu Uatucarbau idozu 766 no invalidez 80 no postu Viqueque villa idozu 1.960 no invalidez 221.

Enkuantu, oráriu pagamentu hosi postu Viqueque villa hahú iha loron 22 novembru to’o dezembru 6, postu Uatucarbau sei halo pagamentu iha loron 13 to’o 17 dezembru, postu Lacluta hahú iha loron 20 to’o 23 dezembru, postu Uatulari sei hahú pagamentu iha loron 04 to’o 14 janeiru no postu Ossu pagamentu hahú iha loron 17 to’o 28 janeiru 2022.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here