Kompetisaun jogu amizade entre arte-marsiál hotu, ne’ebé sei realiza iha GOR Baucau iha loron 26 novembru. Imajen/Espesiál

DILI, 24 novembru 2021 (TATOLI)—Governu liuhosi Sekretaria Estadu Juventude no Desportu (SEJD) hamutuk ho Federesaun Muay Thai sei realiza kompetisaun jogu amizade entre arte-marsiál hotu, ne’ebé sei partisipa hosi atleta Mixed Martial Arts (MMA) Lafaek Timor-Leste na’in-24, iha ámbitu komemorasaun Loron Proklamasaun Independénsia ba dala-46.

Vise-Prezidente Federasaun Muay Thai Timor-Leste, José Maria da Silva, hateten, objetivu envolve MMA Lafaek tanba akumula arte marsiál hotu, nune’e bele hatudu atleta sira nia abilidade.

“Objetivu seluk hosi atividade ne’e, atu minimiza problema joven sira ne’ebé gosta baku malu iha dalan. Entaun ita loke jogu hanesan ne’e di’ak liu hodi joven bele prepara-an, nune’e bele esforsu hetan prémiu, maibé jogu MMA bainhira manán ka lakon sei hetan nafatin prémiu,” Vise-Prezidente Federasaun hateten ba Agência TATOLI, iha resintu SEJD, kuarta ne’e.

Nune’e, atleta ne’ebé sei partisipa iha jogu iha loron 26 novembru 2021 iha GOR Baucau, kompostu hosi mane 22 no feto na’in-rua, hahú hosi idade 17 leten, ne’ebé sei aprezenta klase hahú hosi kilógrama 52 to’o 84.

Atleta sira mai hosi Muay Thay, boxing, arte marsiál sira hanesan Persaudaraan Setia Hati Terate (PSHT), Ikatan Kera Sakti, (IKS) no Tae Kwondo.

Ba inisiativa ne’e, Governu liuhosi SEJD aloka orsamentu ho montante $12.000, ne’ebé kompetisaun ne’e laiha manan-na’in dahuluk no daruak, maibé jogu dala-ida de’it hodi deside sé mak manán no lakon, ne’ebé ba manan-na’in sei hetan osan ho medalla no lakon sei hetan osan no sertifikadu, ho montante osan hahú hosi $100 to’o $150.

“Atleta sira prepara-an, nune’e ita kumpre de’it orientasaun hosi Sekretaria Estadu Juventude no Deportu, oinsá bele kanaliza joven sira hodi ba partisipa jogu amizade ne’e hodi minimiza problema,” nia dehan.

Vise-Prezidente Federasaun husu ba joven-sira atu labele hanoin baku malu de’it, maibé presiza prepara-an didi’ak atu partisipa jogu ne’e hahú iha nasionál to’o internasionál.

Atleta 24 ne’ebé partisipa iha jogu ne’e mak hanesan, Beni Coreia kontra Joni Amaral, Carlos Acau kontra Mario Soares, Jobe Bello kontra Tome Ximenes, Evans Lurdes kontra Anito Fernandes, Manuel Expostu kontra Cristalino Ribeiro, Andreas dos Santos kontra Joel Franco Amaral, Andre Parto kontra Alexandre Freitas, Julimeu Guterres kontra Henani Mota, Francisco Cuco kontra Frederico Ximenes, Basílio da Silva kontra Gilermino Freitas no Valeria de Jesus kontra Nelia Soares.

Jornalista : Arminda Fonseca

Editora      : Julia Chatarina

PUBLISIDADEiklan

1 KOMENTÁRIU

  1. Arte marsial sira neebe governo taka ona maibe loke fali kompetisaun ba sira
    Nusa la loke ba arte marsial sira neebe legal
    Ba arte marsial sira neebe legal imi dehan orsamento laiha mybe orsamento iha fali ba arte marsial ilegal sira mos iha hotu nee beik duni

HAKEREK NO HATÁN

Please enter your comment!
Please enter your name here