Jerente programa WVTL munisípiu Baucau, Zumilda Maria. Imajen Tatoli/Natalino Belo.

BAUCAU, 23 novembru 2021 (TATOLI) – World Vision Timor-Leste (WVTL) realiza semináriu kampaña loron ativismu kona-ba mellora koñesementu lideransa komunitáriu ba atendimentu kazu violénsia doméstika no grupu protesaun labarik ho inkluzivu.

Jerente programa WVTL Munisípiu Baucau, Zumilda Maria, esplika, objetivu hodi semináriu hodi hasa’e koñesimentu autoridade lokál ho autór informál sira kona-ba halo keisa kazu sira-ne’ebé mak akontese iha baze.

“Ami laiha dadus, maibe liuhosi parseiru ita hetan informasaun katak ita hetan mudansa balun, hanesan iha pasadu komunidade sira la hatene atu hato’o keisa ne’ebé maka sira enfrenta nomoos iha informasaun balun iha pasadu, mane sira ladún relata kazu sira-ne’ebé iha maibe liuhosi serbisu hamutuk ho rede servisu iha Baucau ita haree iha progressu,” Zumilda ko’alia iha Vila Nova, tersa ne’e.

Semináriu refere realiza relasiona ho kampaña loron ativizmu hahú hosi loron 25 novembru to’o 10 dezembru ne’ebé hahoris mundu ho kór laranza katak atu hapara violénsia hasoru feto no labarik feto sira.

Durante ne’e, WVTL rasik la rekolla dadus kona-ba violénsia hasoru feto no labarik feto sira maibé liuhosi serbisu ho rede sira iha Baucau hamutuk mellorra atendimentu no responde ba iha kazu protesaun ba labarik nomoos violénsia bazea ba jéneru.

Xefi suku Tirilolo, postu administrativu Baucau vila, Ricardo Ernesto Belo, hateten, liuhosi formasaun nia parte sei kontinua fahe informasaun ba komunidade suku Tirilolo nune’e bele redus problema violénsia hasoru feto no labarik feto iha Baucau.

“Ha’u kontente partisipa semináriu ne’e, ita Timor dalabarak tau ita-nia inan-feton sira iha uma depois sira hatene de’it mak te’in no halo serbisu iha uma maibé sira la hatene sai ba li’ur atu halo serbisu seluk,” Ricardo hateten.

Partisipa iha semináriu ne’e mai hosi rede servisu WVTL, autoridade lokál, komunidade musulmanu no reprezentante juventude sira.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here