Diretór TradeInvesment iha Timor-Leste, Arcanjo da Silva. Imajen Tatoli/Francisco Sony

DILI, 23 novembru 2021 (TATOLI)Investment and Export Promotion Agency, Institutu Públiku (TradeInvest, I.P), hafoin fila hosi Expo Dubai simu ona pedidu liuhosi karta eletrónika (E-mail) hosi investór internasionál sira hodi investe iha setór petrolíferu.

“Setór-sira ne’ebé tenke promove hodi atrai ema investe iha ita-nia rain. Depois ha’u fila hosi Expo Dubai, ha’u simu e-mail hosi partisipante sira-ne’e 10-resin. Maibé ha’u fiar katak ANPM simu liu ida-ne’e, tanba sira mak responsável ba setór petróleu no minerál, dala barak tebes investór balun mai uluk ami-nia odamatan mak ba setór petróleu no dala ruma mós ba uluk sira mak mai ami, ne’ebé serbisu ne’e apoia malu hodi fasilita investidór,” Diretór Ezekutivu TradeInvest, Arcanjo da Silva, hateten iha salaun TradeInvest, Colmera, tersa ne’e.

Nia hatutan, foin lalais TradeInvest mós apoia Ministériu Petróliu no Minerál (MPM), liu-liu Autoridade Nasionál Petróliu no Minerál (ANPM) organiza forum negósiu ba petróleu no minerál iha ámbitu komemorasaun loron proklamasaun independénsia ne’ebé hala’o iha Expo Dubai.

Fórum ne’e abertura hosi Ministru Petróliu no Minerál, Victor da Conceição Soares, no partisipante investidór potensiál sira hamutuk 50-resin.

“Iha aprezentasaun ne’e hosi ANPM aprezenta bloku 18 hodi atrai investidór-sira hodi mai investe iha Timór iha setór petróleu no minarál. Maibé TradeInvest mós hanesan oradór prinsipál ko’alia oinsá mak hahú investimentu iha Timór no SERVE mós kontribui oinsá atu rejista empreza iha Timór no ita fasilita hodi sira bele investe iha Timor-Leste,” nia akresenta.

TradeInvest sei akompaña fali Ministru Koordenadór Asuntu Ekonómiku (MKAE), Joaquim Amaral ba fali Dubai hodi organiza fórum negósiu naun petrolíferu.

“Tanba saida mak organiza de’it fórum negósiu petrolíferu, entaun polítika diversifikasaun ekonomia labele la’o tanba ne’e mak ami tenke ba fila-fali aproveita Expo Dubai ne’ebé to’o iha fulan-marsu 2022 mak taka, entaun iha fulan-fevereiru sei organiza fali forum negósiu naun petrolíferu. Ne’e sei konvida investór potensiál-sira hanesan agrikultór, peska, infraestrutura estratejika, fibra óptika,” nia afirma.

Notísia Relevante: Timor-Leste sei realiza fórum negósiu naun pertrolíferu iha Expo Dubai

 Jornalista : Antónia Gusmão

Editór        : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here